Truk
Die Transvaalse Raad vir die Uitvoerende Kunste (afgekort as Truk of TRUK) is op 3 Januarie 1963 gestig nadat die Nasionale Teaterorganisasie (NTO) ontbind en deur vier provinsiale rade vervang is.[1] Die doel was om die uitvoerende kunste in die Transvaal te bevorder (die gebied wat nou beslaan word deur Gauteng, Mpumalanga, Noordwes en Limpopo). Die raad het ’n subsidie van die staat gekry om verskillende kunsvorms aan te bied en ’n teater te bedryf.
Dit is geregistreer as ’n niewinsgewende vereniging en is bestuur deur ’n raad wat verteenwoordig is deur die provinsiale administrateur en verteenwoorigers van die provinsie, die stede Johannesburg en Pretoria, die departement van nasionale opvoeding, die sakesektor en kunstenaars. Dit het al die fisieke bates van die ou NTO geërf, onder meer verskeie teaters. In die 1980's het die Staatsteater in Pretoria ook bygekom.
Truk het vier kunsvorms aangebied: musiek, opera, ballet en toneel. Dit het klein begin met ’n personeel van omtrent 80 (kunstenaars, tegnici en skoonmakers ingesluit) en het gegroei tot ’n groot administratiewe en tegniese infrastruktuur met ’n aantal permanente geselskappe, insluitende vier toneelgeselskappe in een stadium. Tussen 1963 en 1981 het Truk 484 toneelstukke opgevoer met 18 957 optredes en ’n bywoningsyfer van byna 4,5 miljoen.[1] Van dié stukke was plaaslik, ander was groot oorsese klassieke en moderne werke.
In die 1980's het die administrasie steeds gegroei, maar die permanente kunstenaars is geleidelik vervang met akteurs wat op ’n kontrak aangestel is.
Bibliografie
wysig- TRUK is mondig! Lantern, Tydskrif vir Kennis en Kultuur. Jaargang 34, nr. 1, Januarie 1985.
Verwysings
wysig- ↑ 1,0 1,1 Truk, The Encyclopaedia of South African Theatre, Film, Media and Performance URL besoek op 1 Maart 2013