Twerskajastraat

Twerskajastraat (Russies: Тверская улица [tvʲɪrˈskajə ˈulʲɪt͡sə] Tverskaja oelitsa), tussen 1935 en 1990 bekend as Gorkistraat (улица Горького oelitsa Gorkogo), is die hoofstraalpad van Moskou. Dit loop in noordwestelike rigting vanuit die sentrale Manezjnaja-plein (digby die Kremlin geleë) oor 'n afstand van sowat twee kilometer tot die Tuinring waar dit oorgaan in die Eerste Twerskaja-Jamskaja-straat, die Leningradski-Laan en die Leningradskoje-snelweg - die beginpunt van die M10 na Sint Petersburg.

Die vroeëre Goewerneurspaleis in Twerskaja 13 is in 1947 met twee verdiepings verhoog en huisves tans die kantoor van die Moskouse burgemeester

Izwestija-kantoorgebou (1977)

Die vroeëre Engelse Klub-gebou uit die 1780's huisves sedert 1998 die Staatsmuseum vir Kontemporêre Geskiedenis. Engelse Klubs was in tsaristiese Rusland 'n vergaderplek vir adellike Russe wat beskaafde praatjies in 'n beskaafde omgewing wou voer, met Russies as omgangstaal. 'n Werklik anglofiele klub as vergaderplek vir Britte sou eers later as British Club in Moskou ontstaan

Sneeu lê dik in die winter van 2010/11

Majakofskaja, een van Moskou se mooiste (en diepste) moltreinstasies, is in 2005 van 'n nuwe tweede uitgang tot Twerskajastraat voorsien...

...die noordwestelike vestibuul. Sy plafon is versier met goue mosaïeke, wolke en aanhalings uit Wladimir Majakofski se werke

Sypaadjie in Augustus 2016

Twerskaja is breed genoeg vir militêre parades. In 2015 is onder meer die interkontinentale ballistiese missiel «Ярс» (Jars) vertoon

...maar ook vir politieke optogte. Gedurende hierdie betoging in 2017 speel rubbereende blykbaar 'n sentrale rol

Middagete met president Barack Obama en die Verenigde State se eerste gesin op die dakterras van die Ritz Carlton-hotel in Julie 2009

Vroeër is na Twerskaja dikwels verwys as die "Tsarestraat" - Russiese heersers wat amptelike besoeke aan Moskou gebring of om ander redes vanuit die nuwe hoofstad Sint Petersburg na die Moskwametropool gereis het, het Moskou op Twerskaja binnegekom - so ook Pieter die Grote. Vir die gerieflikheid van tsare was Twerskaja een van die eerste steen-geplaveide strate in Moskou.

Die meeste Moskowiete sal na Twerskaja as dié of tenminste een van Moskou se hoofstrate verwys, al is van die beste restaurante en winkels in die systrate geleë.

Geskiedenis

Twerskajastraat het sy oorsprong in 'n ou handelspad wat Moskou as Tsaresetel met die stad Twer verbind het (vandaar die straat se naam) - destyds die hoofstad van 'n belangrike vorstedom. In die 14de eeu het die eerste geboue langs die Twerskaja ontstaan, opgevolg deur winkels en werkswinkels van ambagsmanne. Met die groei en uitbreiding van Moskou het Twerskaja al hoe belangriker geword as een van die hoofpaaie in die middestad waar bojare en ander welvarendes hulle gevestig het. Gedurende die 17de eeu is die straat geplavei en verbreed.

Eksterne skakels

• Wikimedia Commons het meer media in die kategorie Twerskajastraat.