Vektorveld

In die vektoranalise is 'n vektorveld 'n afbeelding wat elke punt in 'n Euklidiese ruimte (gewoonlik driedimensionele ruimte) aan 'n vektor koppel. 'n Vektorveld in 'n vlak kan voorgestel word as 'n klomp pyltjies wat elkeen aan 'n punt op die vlak vasgemaak is. Vektorvelde wys hoe 'n vektoreienskap, soos snelheid of krag, oor ruimte verander. 'n Vektorveld kan gebruik word om die snelheid van water in 'n wasbak voor te stel: die water het op elke punt in die wasbak 'n snelheid, en die snelheid verander van punt tot punt.