Versnelren
| Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
'n Versnelren is 'n wedren tussen spesiaal gemodifiseerde motors op 'n gelyk, reguit baan oor 'n afstand van sowat 402 m (tradisioneel ʼn kwartmyl). Die motors word gewoonlik met remvalskerms toegerus en maak dikwels van kragtige alkoholbrandstof gebruik.
Die sportsoort het in die twintigerjare in Kalifornië in die VSA ontstaan. Feitlik elke soort motorvoertuig, selfs motorfietse en bate, word vir versnelrenne gebruik, maar die algemeenste is versnelmotors. Die motors het 'n raamwerk van ligte buismetaal, met die enjin (soms is daar twee) so ver moontlik na agter gemonteer. Die bestuurder sit feitlik bo-op of net voor die enjin en word deur rolstawe (rondom die sitplek) beskerm. Die 2 voorwiele is motorfietswiele en die 2 agterwiele is baie breed en van 'n spesiale soort rubber gemaak wat sag en klewerig word wanneer dit warm word, sodat die motor aan die begin van die ren beter kan wegspring.
Versnelmotors word in verskillende klasse ingedeel volgens die soort brandstof wat gebruik word. Die vinnigstes is die wat 'n mengsel van suiwer alkoholbrandstof (gewoonlik metanol en nitrometaan) gebruik, en hulle kan snelhede van meer as 400 km/h haal. Versnelmotors wat van konvensionele petrolbrandstof gebruik maak, is effens stadiger. 'n Derde klas is die "grapmotors", met dieselfde soort raamwerk en enjin, maar met ʼn veselglasbak wat 'n namaaksel van 'n outydse produksiemotor is.
Versnelrenne word in reekse uitdunkompetisies beslis, sodat net die 2 beste motors in elke klas uiteindelik teen mekaar te staan kom. Net 2 versnelmotors ding op 'n slag met mekaar mee. Daar word van gevorderde elektroniese toerusting by die wegspringplek asook by die wenstreep gebruik gemaak, sodat snelhede en plektoekenning noukeurig aangedui kan word. Wanneer die motors verby die wenstreep is, word hulle met behulp van valskerms op 'n rembaan van sowat 800 m tot stilstand gebring. Daar is gewoonlik ook 'n terugkeerbaan parallel met die renbaan vir motors wat hulle beurt gehad het.
Bronnelys
wysig- Wêreldspektrum, 1982, ISBN 0908409699, volume 28, bl. 132, 133
Eksterne skakels
wysig
Wikimedia Commons het meer media in die kategorie Versnelren.
