Wikipedia

Washington Nationals

Die Washington Nationals[1] (noemnaam: Nats) is 'n Amerikaanse professionele bofbalspan wat in Washington, D.C. gebaseer is. Die Nationals kompeteer in Hoofligabofbal (MLB) as 'n lid van die Nasionale Liga (NL) se Oostelike Divisie (NL-Oos). Die span speel hul tuiswedstryde by Nationals Park, geleë in South Capitol Street in die Vlootwerf-buurt in die suidooste van Washington, D.C., langs die Anacostia-rivier.[2] Die span se kleure is skarlakenrooi, vlootblou en wit[3][4].

Die Nationals is die agtste hoofliga-franchise wat gebaseer is in Washington, D.C. en die eerste sedert 1971. Die huidige franchise is in 1969 gestig as die Montreal Expos as deel van 'n uitbreiding van vier spanne in 1969. Eventueel het die liga die Expos gekoop en die span na 'n nuwe stad geskuif, ná 'n mislukte poging om die liga te verklein.[5] Die eienaars van die Hoofligabofbalspanne het Washington, D.C. in 2004 as die span se nuwe tuisstad gekies. Dit was die eerste MLB-franchiseskuif sedert 1971, toe die derde Washington Senators-span (1961–1971) verskuif het na Arlington, Texas om die Texas Rangers te word. Geen MLB-spanne het sedertdien verskuif nie, alhoewel die Oakland Athletics tans besig is om na Las Vegas, Nevada te verskuif.

Terwyl die Nationals aanvanklik gesukkel het nadat hulle na Washington verhuis het, het die span aansienlike sukses deur die 2010's geniet. Die span het hul eerste uitspeelplek en eerste divisietitel in 2012 ingepalm en die NL-Oos divisie in 2014, 2016 en 2017 gewen. Die span kon telkens egter nie daarin slaag om verby die Nasionale Liga Divisiereeks (NLDS) te vorder nie. In 2019 het die span deurgedring na die Wêreldreeks as 'n "Wild Card"-span en die Houston Astros op dramatiese wyse in sewe wedstryde verslaan om hul eerste Wêreldreekskampioenskap te wen.

Aan die einde van die 2023-seisoen is die franchise se algehele wen-verloor-gelykop rekord: 4,194 wedstryde gewen, 4,478 wedstryde verloor en 4 wedstryde gelykop gespeel ('n wenpersentasie van .484). Sedert hul verskuiwing na Washington, D.C. is die span se algehele wen-verloor rekord 1,439–1,535 (ook 'n wenpersentasie van .484).[6]

Verwysings

wysig
  1. ↑ Die span was voorheen bekend as die Montreal Expos
  2. ↑ "Facts & Figures". Nationals.com. MLB Advanced Media. Geargiveer vanaf die oorspronklike op 24 Oktober 2019. Besoek op 24 Oktober 2019.
  3. ↑ "Washington Baseball Timeline–2000s". Nationals.com. MLB Advanced Media. Geargiveer vanaf die oorspronklike op 4 Oktober 2020. Besoek op 25 Mei 2020.
  4. ↑ MLB Advanced Media (26 Julie 2017). "MLB and Nationals unveil the official logo of 2018 All-Star Game". Persberig. https://www.mlb.com/press-release/major-league-baseball-and-the-washington-nationals-unveil-the-official-244604242. Besoek op 12 Mei 2019. "The official logo of the 2018 All-Star Game is as patriotic as its iconic setting. The focal point of the mark is the pristine white United States Capitol dome, which is crowned with the bronze Statue of Freedom. A U.S. flag proudly waves behind it, while the logo is surrounded by a ring of stars. The two stars on the red ring represent the competing leagues, and the six stars on the navy field symbolize their divisions. The ribbon proudly states the location and year of the Midsummer Classic, and to punctuate the mark, the MLB batter is in the colors of scarlet and navy honoring the host franchise." 
  5. ↑ Fainaru, Steve (28 Junie 2004). "Expos for Sale: Team Becomes Pawn of Selig". The Washington Post. p. A01. Geargiveer vanaf die oorspronklike op 15 Julie 2018. Besoek op 13 Julie 2018.
  6. ↑ "Washington Nationals Team History & Encyclopedia". Baseball-Reference.com (in Engels). Geargiveer vanaf die oorspronklike op 10 November 2020. Besoek op 11 November 2020.

Eksterne skakels

wysig
Ontsluit van "https://af.wikipedia.org/w/index.php?title=Washington_Nationals&oldid=2695889"