Westelike Provinsie (Zambië)
| Land | Zambië |
|---|---|
| Hoofstad | Mongu |
| Geleë in administratiewe eenheid | Zambië |
| Geografiese ligging | 16°3′22″S 23°45′8″E |
| Geoshape | Data:Zambia/Western.map |
Zambië se Westelike Provinsie is die verste suidwestelik in die land se tien provinsies, grens in die suide aan Namibië se Caprivistrook en in die weste aan Angola. Die provinsie beslaan 126 386 km2, die naasgrootste in die land en amper 17% van die totale oppervlak. Dit is net ietwat kleiner as Griekeland.[2]
Die Westelike Provinsie het naas die Noordwestelike Provinsie die land se kleinste bevolking en ook net laasgenoemde provinsie is yler bevolk. Die bevolking per vierkante kilometer was in 2009 net 7,62, vergeleke met die landswye gemiddeld van 17,03. Die geskatte bevolking was 962 871 in 2009, 'n toename van meer as 300 000 vergeleke met die 1990-sensus.[3]
Die hoofstad, Mongu, is met 'n geskatte inwonertal in 2009 van 66 382 die grootste nedersetting. Die enigste ander dorpe met 'n noemenswaardige bevolking, is Sesheke (30 686 volgens die 2009-skatting), Kaoma (17 380) en Senanga (11 661).
Die Westelike Provinsie het in die koloniale tydperk as die protektoraat Barotseland bekend gestaan en was enig in sy soort danksy verdrae tussen die destydse opperhoof, Lewanika, en die British South Africa Company. Dit het onder meer immigrasie na die protektoraat beperk en die "Barotse Native Government" en opperhoof mag oor alle aangeleenthede wat die inheemse bevolking raak, gegee.
Die grootste stam in die provinsie is die Lozi, wat hierheen gemigreer het uit die Luba Lunda-koninkryk (wat sy hoogtepunt in die 17de en 18de eeu bereik het) in die huidige Demokratiese Republiek van die Kongo. Enkele eeue later is die Lozi deur die Makalolo verower, wat uit Suid-Afrika voor Shaka Zulu gevlug het. Dié stam se taal, Sikololo, het die Barotse-vlaktes se omgangstaal geword en hulle kultuur leef nog vandag onder inwoners voort, hoewel die Lozi in 1864 in opstand gekom en die Makololo so te sê uitgewis het. Die Lozi se opperhoofman staan as die Litunga beken. Stamlede spits hulle veral op beesboerdery toe.[4]
Verwysings
wysig- ↑ 2022 Census of Population and Housing - Zambia
- ↑ "argiefkopie". Geargiveer vanaf die oorspronklike op 27 Maart 2010. Besoek op 15 Desember 2009.
- ↑ "argiefkopie". Geargiveer vanaf die oorspronklike op 30 Junie 2013. Besoek op 30 Junie 2013.
- ↑ http://www.zambiatourism.com/travel/hisgeopeop/tribes.htm