Wikipedia:Hoe om ’n nuwe bladsy te skep

Alle nuwe gebruikers wil natuurlik weet hoe om 'n nuwe bladsy te skep.

Daar is verskillende maniere om nuwe artikels te skep:

Soos jy deur bestaande artikels lees, kan daar skakels wees wat wys na artikels wat nog nie bestaan nie. Dit word aangedui met 'n rooi skakel of met 'n vraagteken (hierdie gedrag kan by "voorkeure" bepaal word). Deur op so 'n skakel te kliek, sal jy geleentheid kry om die nuwe artikel te skep. Onthou om eers te kliek op Wys voorskou om te sien hoe die resultaat gaan lyk.
Om 'n splinternuwe artikel te skep waarvoor daar nie 'n skakel is nie, kan so 'n skakel in 'n verwante artikel bygevoeg word. So word die verbindings tussen die artikels ook bewerkstellig. Doen dit deur 'n bestaande artikel te redigeer en die skakel by te voeg. Kliek op Wys voorskou, en as alles mooi lyk, Publiseer wysigings (stoor bladsy).
Om 'n artikel te skep sonder om 'n bestaande bladsy te redigeer, wysig jou gebruikerblad of die Sandput en skep 'n skakel soos hier bo. Wys voorskou sal dan 'n skakel wys waarop gekliek kan word, sonder dat dit nodig was dat 'n ander bladsy gewysig moes word. Dan hoef 'n mens nie die verwysingsbladsy te stoor nie.
Nog 'n maklike metode om 'n artikel te skep sonder om 'n bestaande bladsy te redigeer is om die naam van die ongeskepte artikel in die soek-blokkie in te tik en dit dan te soek. 'n Rooi skakel sal in die boodskap wat verskyn. Deur op die rooi skakel te kliek, sal u geleentheid kry om die nuwe artikel te skep.

Nog 'n manier is om die adres in jou webblaaier direk te wysig, byvoorbeeld

http://af.wikipedia.org/wiki/Nuwe_artikel_se_naam

Die laaste drie metodes is nie noodwendig die beste nie aangesien dit kan aanleiding gee tot wees-artikels (artikels waarna daar nie verwys word nie). Hierdie artikels sal dus nie so maklik bruikbaar wees vir iemand wat die ensiklopedie besoek nie.

Let wel!. Dit is nie toelaatbaar om werk wat deur kopiereg beskerm word hier te plaas of te vertaal nie. Kry eers toestemming van die kopiereghouer en noem dat dit hier onder die GNU Free Documentation License versprei sal word.

'n Paar gedagtes:

Soek eers om te kyk of iemand anders reeds aan iets soortgelyk gewerk het. Die artikel wat jy wil skryf, bestaan dalk reeds onder 'n effens ander of sinonieme naam.
Dit is heeltemal wettig om artikels van ander tale hier by Wikipedia te vertaal. Moenie nalaat om die bronnelys ook te plaas nie. Noem die bronartikel ook in jou bronnelys.
Dis nie altyd nodig om groot volledige artikels te skep nie. Alhoewel dit natuurlik die beste is, kan artikels ook maar stuksgewys geskryf word. 'n Kort, akkurate artikel is beter as niks en is 'n goeie fondasie om verder te verwerk.
As jy wettiglik die werk van ander mag gebruik (werke waarvoor kopieregbeskerming verval het, publieke domeinmateriaal, ens.), doen dit gerus. Vra gerus mense om hulle werk aan Wikipedia te skenk, maar onthou om ons lisensievoorwaardes baie duidelik te stel. Werk onder kopieregbeskerming kan nie hier bygedra word nie, weens regsimplikasies.
Skryf op 'n manier wat ander inspireer om ook by te dra. Skep gerus skakels na sinvolle onderwerpe, al bestaan die teikenartikels nog nie. Te veel skakels kan natuurlik die leesbaarheid bemoeilik.
Onthou dat niemand 'n artikel "besit" nie. Elke artikel moet ons elkeen se trots wees, maar daar is geen alleeneienaarskap nie. Ons almal werk saam. Meeste sal seker wel 'n bietjie ruimte gee terwyl iemand nog besig is om 'n artikel te vertaal - maar moenie ontmoedig voel as iemand dadelik inspring en begin help met jou nuwe bydrae nie.
Lees gerus mettertyd deur ons Beleid. Dit sal help dat jy nie te veel op ander se tone trap nie, maar jy hoef nie alles te lees voordat jy begin nie. Daar is wel nuttige skryf- en stylwenke, waarvan die belangrikste seker ons beleid van neutrale oogpunt is. In die Engelse dokumentasie word hierdie gereeld afgekort met NPOV (Neutral point of view).

Sien ook

Wikipedia:Titelriglyne
Starting a new page by meta.wikipedia.org