Wikipedia:WikiProjek Afrikaanse CD

Projeknaam	Afrikaanse CD
Status:	Aktief
Vordering:	Besig met skep en redigering van kernartikels.

Van die Wikipedia projekte stel 'n CD of DVD vry wat deur persone sonder internettoegang, of wat nie lank genoeg aan-lyn kan bly nie, gebruik kan word. Die bladsy dien as werkgroep om uiteindelik ook die Afrikaanse Wikipedia op CD/DVD beskikbaar te stel. So 'n projek sal nie net Afrikaans na ons gemeenskappe uitdra nie, maar sal ook help om nuwe bydraers hierheen te lok.

Plan van aksie

Regmaak van sintaksfoute

Voordat ons kan begin moet al die sintaksfoute in die artikels hier reggestel word. Indien nie sal meeste omskakelingsprogramme faal of slegte afvoer lewer. As jy hiermee kan help, sien asseblief die Check Wikipedia-projek.

Al die ernstige foute is reggestel en ons kan ons aandag skuif na die identifisering van artikels wat op die CD/DVD moet verskyn.

Identifiseer artikels

Besluit watter artikels (al dan nie) op die CD/DVD moet verskyn. Die hoeveelheid artikels sal bepaal of ons van CD- of DVD-formaat gebruik sal moet maak.

Insluitingslys:

Begin klein, miskien met slegs die voorbladartikels. Identifiseer dan skoolonderwerpe en ander belangrike onderwerpe om in te sluit. Slordige of onvolledige artikels sal outomaties gediskwalifiseer word.

Uitsluitingslys:

Plaas al die beskikbare artikels op die CD/DVD, maar sluit sekere onderwerpe wat nie vir kinders geskik is nie, of nie aan sekere reëls voldoen nie, uit. As die benadering gevolg word sal ons DVD-formaat moet gebruik aangesien 'n CD te klein sal wees.

Dit sal ook moontlik wees om verskeie CD's oor spesialis onderwerpe uit te skryf. So byvoorbeeld kan ons 'n CD hê met skoolonderwerpe, sportartikels, ens.

Logo, inleiding en voorblad

Ons het persone nodig wat kan help om 'n logo vir die CD/DVD se voorblad te ontwerp en om 'n inleiding te skryf. Die voorblad moet 'n gerieflike indeks verskaf om na die artikels en kategorieë op die CD te navigeer.

'n Konsep voorblad is hier beskikbaar. Voel vry om dit te wysig of verder uit te brei.

Formaat

Die CD/DVD moet verkieslik standaard HTML en standaard beeld-formate (gif, jpg en png) gebruik. Indien 'n ander formaat gekies word moet leser-programme vir beide Linux en Windows beskikbaar wees.

Die volgende sal uit artikels op die CD/DVD verwyder word:

• Rooi skakels na ongeskryfde artikels
• Eksterne skakels en die "==Eksterne skakels==" afdeling
• Sjablone wat na ander projekte wys, soos Commons, CommonsKategorie, Wikt, ens.

Kopiereg en lisensiëring

Die teks op die CD/DVD sal aan die GNU-lisensie vir vrye dokumentasie onderhewig wees (selfde as Wikipedia). Die kopiereg op beelde sal afsonderlik aangedui moet word, terwyl sekere beelde (soos die "billike gebruik"-beelde) selfs uitgesluit sal moet word.

Koste en verspreiding

Die CD/DVD sal gratis afgelaai en ook gratis aan ander versprei kan word. Waar kan mens nou 'n beter opvoedkundige geskenk kry wat nie 'n arm en 'n been sal kos nie?

Persone wat bereid is om CD/DVD's te skryf en uit te pos sal wel 'n fooi daarvoor kan vra. 'n Goeie idee is om die prys van die CD effens op te stoot sodat dit gratis aan skole en instansies wat nie daarvoor kan betaal nie gepos kan word.