Maak hoofkeuseskerm oop

Wikus du Toit is ’n senior lektor in Filmmusiek aan AFDA (South African School of Motion Picture and Live Performance) en ’n Afrikaanse akteur en dramaturg.

Lewe en werkWysig

Johannes Lodewikus du Toit is op 18 Junie 1972 in Bethal in Mpumalanga gebore. Hy gaan op sy geboortedorp skool en matrikuleer aan die Hoërskool Hoogenhout. Na sy nasionale diensplig aan die Lugmaggimnasium op Valhalla naby Pretoria, voltooi hy sy Graad VIII Musiekeksamen aan die Universiteit van Suid-Afrika. Hy studeer aanvanklik argitektuur, maar verander dan van studierigting en skakel oor na Drama. Hy skryf in vir die Nasionale Diploma in Drama aan die Technikon Pretoria (later die Tshwane Universiteit van Tegnologie) en behaal hier sy B.Tech. Drama-graad en sy M.Tech. Drama-graad (cum laude) oor die ontwikkeling van kabaret in Suid-Afrika. Daarna woon hy kursusse in koormusiek by aan die Universiteit van Graz in Oostenryk en hy studeer ook onder John Kander (van “Chicago”-faam) aan die New York Universiteit.

Benewens akteur is hy ’n besonder veelsydige kunstenaar wat sy merk maak as komponis, sanger en skrywer. As akteur tree hy op in meer as vyftig verhoogproduksies, tien televisiereekse en vier films. Van sy rolle op televisie sluit in “Egoli” en “Proesstraat” en op die verhoog tree hy op in onder andere “Brakanjan”. Verder vertolk hy rolle in die rolprente “Stander”, “A case of murder” en “Semi-soet”. Hy is die wenner van Vita Toekennings in 2001 as akteur vir sy spel in “El Grande de Coca-Cola” en in 2002 in “play@risk”. In 1995 kry hy ook ’n ATKV Crescendo Toekenning vir sang. Verder is hy betrokke in regie en kry twee Aardvark-nominasies by die Aardklop-Kunstefees vir sy teks en regie van Elzabé Zietsman se vertoning “smallchange”. Hy dien per geleentheid op Innibos-Kunstefees se keuringspaneel, is ’n beoordelaar vir die KKNK se Kanna-pryse en is ook ’n SAMA-beoordelaar. Hy is senior lektor in Filmmusiek aan die Suid-Afrikaanse Filmskool (AFDA) in Auckland Park en woon in Killarney in Johannesburg.

SkryfwerkWysig

In 1997 wen hy ’n De Kat Toekenning by die Klein Karoo Nasionale Kunstefees vir sy kabaret “Ses”. Die Afrikaanse musiekspel “Antjie Somers”, waarvan hy die mede-komponis is, wen in 2000 ’n Fleur de Cap-toekenning vir beste musiekspel. In 2002 verower sy kabaret “Tien gesprekke oor die man wat nie wou huil nie” die KKNK/Nagtegaal Teksskryfkompetisie by die KKNK. Die komedie “Sing” word in 2008 die eerste keer op die planke gebring. Die stuk speel af tydens Lodewyk XIV, die Franse sonkoning, se bewind. Twee onderdane wag vir die koning se minnares, Madame Ratuur, om op te daag vir ’n sangles, maar word beveel om haar van kant te maak. In 2009 is “Kaptein Geluk” op die kortlys vir die toekenning van die Nagtegaalprys vir nuwe dramatekste en dit word uiteindelik met die tweede prys bekroon. Die tema hiervan is verhoudings en die aftakeling en persoonlike groei wat daarmee gepaardgaan. “Sirkus” beskryf ’n mensvretende sirkus wat ’n klein dorpie binneval. Hy skryf ook die televisiereeks “Roer jou voete”.

BronnelysWysig

Tydskrifte en koeranteWysig

  • Korrespondent “Fourie wen nuwe dramaprys” “Beeld” 6 November 2002
  • Spesiale verteenwoordiger “Wenner van Slurpie prys maak opslae met ‘Ses”” “Die Burger” 5 April 1997

InternetWysig

Ander verwysingsWysig