Wiskunde-gebou UP

Die Wiskunde-gebou op die Hatfieldkampus van die Universiteit van Pretoria, was oorspronklik bekend as die Administrasiegebou. Die gebou, ontwerp deur Gordon Leith, ’n assistent van Sir Herbert Baker, weerspieël die kenmerkende elemente van die Klassieke argitektoniese styl. Dit was die eerste gebou op kampus wat afgewyk het van die destydse strukturele- en ontwerpneigings. Konstruksie het in 1930 begin en die gebou was later in 1954 vergroot. Die argitek Strauss Brink was verantwoordelik vir die ontwerp van die nuwe toevoeging. Daar is 'n groot geteëlde kompas in die binnehof, wat die ware magnetiese rigtings aandui. Die Departement Wiskunde het in 1982 in die gebou ingetrek, toe 'n administrasiegebou in gebruik geneem is. Sedertdien staan die gebou bekend as die Wiskunde-gebou.