Wikipedia

Wolfsherz

Wolfsherz is 'n gruwelroman (1997) geskryf deur die Duitse skrywer, Wolfgang Hohlbein, met die weerwolf as tema.

Intrige

wysig

Iewers in die voormalige Joego-Slawië ontmoet die Duitse joernaliste-egpaar, Stefan en Rebecca Mewes, vir die Russiese huursoldaataanvoerder, Barkow. Barkow is bereid, vir hul reputasie wat die egpaar bereid is om op die spel te plaas, om geheime dokumente uit te lek (wie sy opdraggewers is). Wat veronderstel was om 'n eksklusiewe onderhoud te wees verongeluk toe hul tolk en chauffeur, die vermeende Oostenryker Wissler, ontpop in 'n Amerikaanse geheime agent en Barkhoff aan die onderhoudstafel doodskiet.

Die drie slaan op die vlug na die voet van die berg, in 'n vallei bekend as Wolfsherz, waar daar baie wolwe ronddwaal. Soos Wissler/White vooraf georganiseer het, sal 'n helikopter hulle naby die rivier teen dagbreek oppik. Die joernaliste-egpaar is woedend omdat Wissler hulle bloot as lokaas gebruik het. Nog 'n paar minute voor die onderhoud, teen die bergpas uit, is Rebecca seker sy het 'n kindergehuil gehoor; in die vallei hoor sy dit weer. By nadere ondersoek vind hulle 'n dogtertjie, 'n "wolfskind", wat aggressief deur die wolwe bewaak word. Die storie loop dat mense uit suiwer bygeloof hul kinders as (mense)offers uitsit sodat die wolwe die dorpe met rus kan laat. Rebecca glo die kind verkeer in groot gevaar en wil haar willens en wetens na veiligheid bring. Hiervoor is die wolwe nie te vinde nie, en al drie volwassenes kry 'n paar happe weg voordat die aankomende helikopter die trop wolwe met geweerskote uiteenjaag. Rebecca is vas van plan om die dogtertjie aan te neem in Duitsland; tydens 'n motorongeluk het sy nie alleen haar ongebore 7 maande oue baba verloor nie, maar ook haar vrugbaarheid. Die kind, wat sy Eva noem, beskou sy as 'n teken. Wissler belowe om die Mewes by te staan, maar skielik begin aanrandings (o.a. die sosiale werkster, Frau Halberstein) en moord in die buurt, asook die hospitaal plaasvind. Die polisiebeampte, Dorn, vermoed aanvanklik Stefan probeer druk op die owerhede uitoefen en toutjies trek om die kind aangeneem te kry. Stefan wis egter van geen sout of water nie.

Een van die slagoffers is Suster Danuta, 'n Joegoe-Slawiër wat oortuig is klein Eva is 'n vouk (wolf) en Stefan meedeel dat die verhale rondom vampiere, bloedsuiers en vervloekte kastele blote versinsels is om die mens van die waarheid, die véél ouer oorspronklike verhale, te weerhou. In sekere plekke in Europa het die tyd wel stil gaan staan (met voor-Middeleeuse gebruike) en sy vra haarself die vraag af of mens jouself die reg kan toeëien om in te meng, veral as jy hierdie kultuur en gebruike geen woord van kan verstaan nie.

Hoewel Rebecca lankal, net soos Stefan, genees is en ontslaan kan word, hou sy haar doelbewus siek om elke dag by die kinderkliniek 'n wakende oog oor Eva te hou. Eva is onder die sorg geplaas van professor Wallberg. Sowel Stefan as Rebecca besef hulle is aan die verander: hul sintuie verskerp en hulle beskik oor bomenslike krag. Stefan word ook toenemend onverhoeds oorval deur sy dierinstinkte. Dit kom hom ook goed te pas, veral noudat die manne van Barkow (onder die aanvoering van sy seun, die opvolger) op die oorlogspad in Duitsland is om bloedwraak te neem. Wissler het alle bewyse met hom saamgeneem (die diktafoon inkluis), en aangesien die egpaar die enigste was wat hul woonadresse gegee het (soos dit tydens die reëlings vereis was), word die Mewes vir die dood van Barkow verantwoordelik gehou. 'n Verdere kinkel in die kabel is weerwolfagtige menswolfhibriedes (soos Sonja en haar broer) wat dwarsoor die stad hul opwagting begin maak en hierdie vondeling, Eva, voorheen bekend as Liddia (Sonja se suster), begin terugeis. Sonja probeer Stefan oortuig dat Liddia in die moderne samelewing sal sterf; sy hoort tussen haar eie mense/weerwolwe. Op sy beurt weet Stefan sy vrou Rebecca sal sterf as sy wéér 'n kind moet verloor; sy sal om die dood nie van die kind afstand wil doen nie.

Stefan en Rebecca slaan met Eva uit die hospitaal op die vlug en gaan kruip weg by Rebecca se skatryk broer, Robert Riedberg. Wanneer die weerwolwe én die huursoldate op die herehuis toesak, breek die hel los: die Russe raak in 'n bloedige stryd met die polisie betrokke, terwyl die mense agter slot en grendel met die weerwolwe te kampe kry. Met behulp van Wissler word die weerwolwe van kant gemaak. Die huis staan in ligte laaie. Die huursoldate word wysgemaak dat die weerwolwe vir hul leier se dood verantwoordelik is.

Die sirkel word maar weer rond en almal keer terug na Wolfsherz. Die Russe begin om die eeue-oue weerwolftroppe doer onder in die vallei een na die ander uit te delg, terwyl in die hoofkwartier van Barkow Wissler probeer om Stefan, laasgenoemde nou self 'n weerwolf deur die toedoen van Wissler (wat gerieflikheidshalwe op die helikopter die uitwerking van die bytwonde kon verhinder het deur afbinding, sonder om Stefan of Rebecca hoegenaamd te help), om die lewe te bring. Die Amerikaner het bloot sy eie vendetta teen die weerwolwe gevoer, omrede hulle sy pasgetroude vrou (en ses ander mense) op hul wittebrood twintig jaar tevore verskeur het. Stefan konfronteer die Amerikaner dat die weerwolwe nie sonder rede sou aangeval het nie - die mens het hul wêreld binnegedring, nie andersom nie. Die Amerikaner ontplof: daar is geen plek ter wêreld vir hierdie skepsels nie - hulle behoort almal uitgeroei te word. Dit maak egter nie saak watter kant onder in die vallei nou wen of verloor nie - dié wat oorbly sal magteloos voor Wissler staan (twee vlieë met een klap). Voordat Matt, Wissler se handlanger, Stefan kan skiet, kry hy die kopskoot van Dorn. Rebecca en Eva, wat albei intussen in weerwolwe verander het, maak korte mette van Wissler, voordat die Amerikaner Stefan die geringste leed kon aandoen. Terwyl die huursoldate en die weerwolwe mekaar in die vallei aan die keel gryp, staan Stefan, Rebecca, Eva, Dorn maar ewe geduldig en wag tot die oorlog uitgewoed het, om 'n nuwe weerwolftrop te begin.

Agtergrond

wysig

Soos so baie Hohlbein-romans het ook hierdie roman geen gelukkige einde in die klassieke sin van die woord nie; die hoofkarakter kom bloot voor 'n nuwe, angswekkende probleem te staan.

Uitgawes

wysig

Webskakels

wysig
Hierdie artikel is in sy geheel of gedeeltelik vanuit die Duitse Wikipedia vertaal.
Ontsluit van "https://af.wikipedia.org/w/index.php?title=Wolfsherz&oldid=2447388"