Zahn de Bruyn

Zahn de Bruyn is 'n Afrikaanse digter en programbestuurder by die Universiteit Stellenbosch se Sakeskool.

Lewe en werk

Zahn de Bruyn is in 1965 in Kaapstad gebore en word op 'n kleinhoewe by The Crags, naby Plettenbergbaai groot. Sy matrikuleer in 1982 aan die Hoërskool Knysna en studeer daarna vanaf 1983 verder aan die Universiteit Stellenbosch, waar sy in 1986 'n B.A.-graad behaal met Frans, filosofie en politieke filosofie as hoofvakke. Daarna reis sy van Oktober 1988 in die buiteland en vertoef onder meer in Israel, Oos-Europa en Parys, waar sy onder andere 'n sieklike bejaarde vrou oppas. Sy word later 'n programbestuurder by die Universiteit Stellenbosch se Bestuurskool vir uitvoerende bedryfsleieropvoeding. Ná haar troue staan sy bekend as Zahn de Bruyn-Stander.

Skryfwerk

Sy debuteer reeds op agtienjarige leeftyd met die bundel^[1] Kaia vir die tye.^[2] Hierin word veral die skoollewe en jeugdige gevoelens ontgin.^[3] Hoewel die beperkte lewensraamwerk uit die tematiek blyk, toon die bundel tog groot belofte met 'n vars kyk op bekende dinge, beskryf met 'n positiewe drif en die direktheid van onskuld. Haar gedig Wêreld word in die Noordwesprovinsie en in die Wes-Kaap voorgeskryf vir eksaminering van Afrikaans as Tweede Taal. In 2000 wen haar gedig Train ponderings of a drowning rat 'n tweede prys in 'n kompetisie uitgeskryf deur die "Poetry Institute of Africa". Van haar gedigte word in verskeie versamelbundels opgeneem, waaronder Groot verseboek, Die Afrikaanse poësie in 'n duisend en enkele gedigte en Goudaar. In 2020 word haar gedig 'Fetus in biologie-klas' opgeneem in Vers en vrou. Sy publiseer ook in letterkundige tydskrifte soos Standpunte. Haar kortverhaal Die afspraak word opgeneem in die versamelbundel Vrou: Mens saamgestel deur Corlia Fourie.

Publikasies

Jaar	Publikasies
1983	Kaia vir die tye

Bronnelys

Boeke

De Bruyn, Zahn “Kaia vir die tye” Tafelberg-Uitgewers. Kaapstad. Eerste uitgawe. Eerste druk. 1983
De Wet, K. (samest.) 2020. Vers & vrou. Kaapstad: Human & Rousseau.
Kannemeyer, J.C. “Die Afrikaanse literatuur 1652-2004” Human & Rousseau. Kaapstad en Pretoria. Eerste uitgawe. 2005

Internet

Esaach: http://www.esaach.org.za/index.php?title=De_Bruyn,_Zahn

Resensies

↑ Brink, André P.: Rapport 3 Junie 1984
↑ Cilliers-Preller, Rika. Die Burger. 28 Junie 1984
↑ Cloete, T.T. “Tydskrif vir Letterkunde” Jaargang 22 no. 4, November 1984

[1] Brink, André P.: Rapport 3 Junie 1984

[2] Cilliers-Preller, Rika. Die Burger. 28 Junie 1984

[3] Cloete, T.T. “Tydskrif vir Letterkunde” Jaargang 22 no. 4, November 1984

[1]

[2]

[3]