2010 TK7
2010 TK7 is die eerste Aarde-trojaan wat ontdek is; die asteroïde lê voor die Aarde in sy wentelbaan om die Son.[3][4] Trojane kan die beste beskryf word as ’n voorwerp by ’n Lagrange-punt (’n stabiele ligging waar swaartekrag en middelpuntvliedende kragte mekaar balanseer) 60 grade voor of agter ’n groot wentelende liggaam, in ’n soort 1:1-verhouding van wentelperiodes. Sulke voorwerpe is vroeër ontdek in die wentelbane van Mars, Jupiter, Neptunus en die Saturnus-mane Tethis en Dione.
 Die asteroïede 2010 TK7 (in groen sirkel) afgeneem deur die Wide-field Infrared Survey Explorer. | |
| Ontdekking | |
|---|---|
| Kleinplaneet-kategorie | Aarde-trojaan |
| Wentelbaaneienskappe[1] | |
| Afelium | 1,1910871 AE |
| Perihelium | 0,809410 AE |
| Halwe lengteas | 1,0002487 AE |
| Wentelperiode | 365,3932 d. (1,0003921 jr. |
| Gem. anomalie | 251,4032° |
| Baanhelling | 20,8823° |
| Lengteligging van stygende nodus | 96,5283° |
| Periheliumhoek | 45.8527° |
Fisiese eienskappe |
|
| Afmetings | ~300 m[2] |
| Skynmagnitude | 20,8 (wanneer naby Aarde) tot 23,6 |
| Absolute magnitude | 20,8[1] |
2010 TK7 het ’n deursnee van sowat 300 m.[2] Sy pad wissel om die Son-Aarde se L4-punt (60 grade voor die Aarde), en beweeg elke sowat 400 jaar tussen sy naaste afstand aan die Aarde en sy naaste afstand aan die L3-punt (180 grade van die Aarde af).
Die asteroïde is in Oktober 2010 ontdek deur die NEOWISE-span sterrekundiges met behulp van Nasa se Wide-field Infrared Survey Explorer (WISE).[5]
Eienskappe
wysig
2010 TK7 het ’n absolute ligsterkte van sowat 20,8 magnitude.[1] As die albedo as 0,1 aanvaar word, is die geraamde deursnee sowat 300 m.[3] Geen spektraaldata is nog bekend om sy samestelling vas te stel nie. Die asteroïde sal ’n oppervlakswaartekrag hê van minder as ’n 20 000ste dié van die Aarde.
Toe dit ontdek is, het dit elke 365,389 dae ’n wentelbaan om die Son voltooi, in vergelyking met die Aarde se 365,256 dae. Sy langtermyn-wentelperiode sal egter met die Aarde s’n ooreenstem solank hy in sy huidige posisie bly. In sy eksentrieke wentelbaan (e = 0,191) wissel 2010 TK7 se afstand van die Son af jaarliks tussen 0,81 en 1,19 astronomiese eenhede (AE).[3] Sy wentelvlak vorm ’n hoek van sowat 21 grade met die vlak van die sonnebaan.
Trojane bly nie reg by die Lagrange-punte nie, maar beweeg verder en nader daaraan. Dit neem 2010 TK7 altesaam 395 jaar om ’n siklus (heen en weer) te voltooi. Die pad wat die asteroïde beweeg, vorm so ’n lang ovaal dat hy hom soms amper aan die teenoorgestelde kant van die Son as die Aarde bevind. Hy kom nooit nader as 20 miljoen km van die Aarde af nie; dit is meer as 50 keer die afstand na die maan. In 2010/2011 was 2010 TK7 by sy naaste punt aan die Aarde,[3] wat help lei het tot sy ontdekking.
Die asteroïde se wentelbaan het chaotiese eienskappe, wat langtermynvoorspellings bemoeilik. Voor 500 n.C. kon dit by die Son-Aarde se L5-punt (60 grade agter die Aarde) voorgekom het, voordat dit via L3 na L4 gespring het.
Verwysings
wysig- ↑ 1,0 1,1 1,2 "JPL Small-Body Database Browser: 2010 TK7" (2010-10-31 last obs) (in Engels). Geargiveer vanaf die oorspronklike op 7 Augustus 2011. Besoek op 17 Augustus 2012.
- ↑ 2,0 2,1 Choi, Charles Q. (27 Julie 2011). "First Asteroid Companion of Earth Discovered at Last" (in Engels). Space.com. Geargiveer vanaf die oorspronklike op 27 April 2020. Besoek op 27 Julie 2011.
- ↑ 3,0 3,1 3,2 3,3 Connors, Martin; Wiegert, Paul; Veillet, Christian (27 Julie 2011). "Earth's Trojan asteroid". Nature. 475 (7357): 481–483. Bibcode:2011Natur.475..481C. doi:10.1038/nature10233. PMID 21796207. Besoek op 27 Julie 2011.
- ↑ NASA's WISE Mission Finds First Trojan Asteroid Sharing Earth's Orbit Geargiveer 2 Mei 2017 op Wayback Machine. Nasa.gov. URL besoek op 2011-07-29.
- ↑ Keys, Sonia (7 Oktober 2010). "MPEC 2010-T45 : 2010 TK7". Minor Planet Electronic Circular (in Engels). IAU Minor Planet Center. Geargiveer vanaf die oorspronklike op 1 Februarie 2020. Besoek op 31 Julie 2011.
- Amos, Jonathan (28 Julie 2011). "Trojan asteroid seen in Earth's orbit by Wise telescope". BBC News. Besoek op 29 Julie 2011.
Eksterne skakels
wysig- 2010 TK7 in die MPC-databasis
- Nasa-animasie van 2010 TK7 se beweging
Hierdie artikel is vertaal uit die Engelse Wikipedia
