Aasvoëlkop
Aasvoëlkop is 'n 1 787 m hoë heuwel in Johannesburg, Gauteng, waarop die Northcliff-watertoring gebou is. Die koppie is sowat 10 km noordwes van die Johannesburgse stadsaal.
Die naam is 'n verafrikaansing van die Nederlandse Aasvogelkop. In die pionierstyd voor die spoorlyn uit die Kaap Johannesburg bereik het, was tot duisend ossewaens op 'n keer op pad om die Vaalrivier by Viljoensdrif oor te steek. Trekosse wat onderweg na die Rand gevrek het, is langs die pad gelos. Duisende aasvoëls het dan aan hulle kom vreet. Aasvoëlkop, toe nog ver van enige bewoonde gebied, was een van die voëls se gunsteling-bymekaarkomplekke. Die NG gemeente Aasvoëlkop se naam is aan die heuwel ontleen, terwyl die "mont" (berg in Frans) in die voorstad Montroux se naam verwys na Aasvoëlkop.
Bron wysig
- (en) Raper, Peter Edmund. 2004. New Dictionary of South African Place Names. Johannesburg & Cape Town: Jonathan Ball Publishers.