Advocaat
| Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Advocaat of advocatenborrel, in Duitsland ook bekend as Eierlikör, is 'n tradisionele Nederlandse en Duitse alkoholiese drank wat van eiergeel, suiker en brandewyn gemaak word. Die ryk en romerige drankie beskik oor 'n gladde, vla-agtige digtheid. Die tipiese alkoholinhoud is gewoonlik tussen 14% en 20% ABV . Die inhoud daarvan kan 'n mengsel wees van eiergele, aromatiese spiritualieë, suiker of heuning, brandewyn, vanielje en soms room (of ingedampte melk ). Belangrike vervaardigers van Advocaat sluit in die handelsmerke Bols, Darna Ovo Liker, DeKuyper (in twee variëteite) en Verpoorten.
Etimologie wysig
Daar is twee teorieë oor die oorsprong van "advocaat".
Volgens verskeie vervaardigers, soos Verpoorten en Bols, en die "Oxford handleiding op suiker en lekkers", kan die oorsprong daarvan teruggespoor word na "abacate", 'n alkoholiese drankie van die inheemse bevolking van Brasilië, wat dit met avokadopeer gemaak het. Nederlandse koloniale inwoners van Noord-Brasilië het hierdie drank aan Europa bekendgestel as "advocat/advocaat". Aangesien avokado's nie in Noord-Europa groei nie, is dit vervang met eiergeel, wat vermoedelik oor 'n soortgelyke smaak en digtheid beskik; die naam is derhalwe afgelei van die avokado, alhoewel die drankie nie avokadopeer bevat nie. [1] [2]
"Advocaat" is ook die Nederlandse benaming vir prokureur, en derhalwe verskil dit van Afrikaans, waar die woord "advokaat" 'n enger betekenis het, dit wil se 'n regsgeleerde wat gewoonlik deur 'n prokureur ge-breveteer word en hoofsaaklik in die howe bedrywig is waar hulle die sake van kliënte in die howe aanvoer en argumenteer. Die naam van die drankie is kort vir advocatenborrel, of "prokureurs drankie", waar "borrel" die Nederlandse benaming is vir 'n klein alkoholiese drankie wat op tydsame wyse tydens 'n sosiale byeenkoms geledig word. Volgens die 1882-uitgawe van die Woordenboek der Nederlandse taal, is dit "zoo genoemd als een goed smeersel voor de keel, en dus bijzonder dienstig geacht voor een advocaat, die in 't openbaar het woord moet voeren".
Tipes en gebruike wysig
Flesse en breë bottels dik advocaat word hoofsaaklik in Nederland en België verkoop, alhoewel dit ook in Duitsland en Oostenryk beskikbaar is. Die viskositeit van ander uitvoere is van 'n meer vloeibare aard as die wat in Europa beskikbaar is.
In die besonder word die oorspronklike dik variëteit, dit wil sê sonder albumien (eierwit) gebruik as o.a. 'n bolaag vir wafels, pannekoeke- of poffertjies, as 'n bestanddeel vir roomys, vla, gebak en soortgelyke nageregte, of as 'n apéritief of spysverteringsmiddel. Laasgenoemde, bedek met geklopte room en beurtelings met 'n tikkie kakaopoeier besprinkel, word in 'n baie klein bakkie of 'n klein glas gesit waaruit dit geëet word met behulp van 'n teelepel. In Belgiese restaurante en tavernes kan dit 'n komplementêre aanvulling by koffie wees.
Beide dele van die eiers word in die uitvoervariëteit gebruik. Die bekendste skemerkelkie wat van advocaat gebruik maak staan bekend as die "Snowball": 'n mengsel van advocaat, limonade en soms (hoewel dit nie nodig is nie) lemmetjiesap wat gereeld tydens kersfeestyd genuttig word. 'n Ander skemerkelkie wat daarvan gebruik maak staan bekend as die "Fluffy duck" en word van rum gemaak. 'n Ander Advocaat-gebaseerde drankie is die Bombardino, 'n drankie wat algemeen in Italiaanse ski-oorde genuttig word, veral in die Italiaanse Alpe, en wat gemaak word deur Advocaat, brandewyn en geklopte room te meng. [3]
Verwante drankies wysig
Die Poolse ekwivalent, "ajerkoniak" (de: Eier —in Afr. ook eier; fr: Cognac (Afr: konjak), bestaan uit wodka in plaas van brandewyn, ondanks die naam.
Rompope van Meksiko en Sabajón van Colombia is soortgelyke likeurs wat gemaak word van eiergeel en vanielje. Sommige variëteite het ekstra aroma's.
Verdere leeswerk wysig
- Marcus, Lori (2003). Bartending Inside-Out: The Guide to Profession, Profit and Fun (3de uitgawe). Crystal Bay, Nev.: Cadillac Press. ISBN 9780964201989.
- Walton, Stuart (2004). The Ultimate Book of Cocktails: How to Create Over 600 Fantastic Drinks Using Spirits, Liqueurs, Wine, Beer and Mixers. London: Hermes House. ISBN 9780681768819. OCLC 156369625.
Verwysings wysig
- ↑ "Verpoorten". Verpoorten_history (in Duits). Geargiveer vanaf die oorspronklike op 13 Mei 2020.
- ↑ "Bythedutch-website" (in Engels). Geargiveer vanaf die oorspronklike op 23 Oktober 2019. Besoek op 14 Junie 2020.
- ↑ "Bombardino-Calimero". 12 Bottle Bar. 9 Desember 2010. Besoek op 7 Februarie 2012.