Afrikaanse Protestantse Akademie
Die Afrikaanse Protestantse Akademie (APA) is 'n privaat Christelike Afrikaanse voorsiener van tersiêre onderrig. Volgens die privaat hoëronderwysinstelling se webtuiste is hul doelwit "om uitnemende tersiêre onderrig in Afrikaans te bied, vanuit ’n klassiek-Christelike vertrekpunt, aan die hand van geakkrediteerde tersiêre onderwysprogramme, om so ons hedendaagse samelewing met ’n Bybelse lewensbenadering te ontmoet."[2] Die APA se leuse is: “Ou Spore – Nuwe Weë” en volgens hul webwerf "ontwikkel [die instelling] leiers akademies in Afrikaans wat streef na ’n lewe van klassieke Christelike skoonheid, harmonie en wysheid saam met ander."[3]
| Afrikaanse Protestantse Akademie | |
|---|---|
| Gestig: | 1988 |
| Tipe: | Privaatuniversiteit |
| Rektor: | Professor dr. G.D.S. Smit[1] |
| Ligging: | Hatfield, Pretoria |
| Kampus: | Stedelik |
| Bynaam: | APA |
| Webtuiste: | apa.ac.za |
Ontstaan wysig
Die Afrikaanse Protestantse Akademie NPC (APA) het in 1988 ’n nederige, dog gefokusde begin gehad as teologiese skool van die Afrikaanse Protestantse Kerkverband. In 1999 is die APA amptelik as privaat tersiêre instelling by die Departement van Hoër Onderwys geregistreer met die bevoegdheid om die grade B.A. (’n kwalifikasie in die geesteswetenskappe) en B.Th. (’n kwalifikasie in die teologie) toe te ken. In 2017 is die Nagraadse Gevorderde Onderwyssertifikaat (NGOS) geakkrediteer. Die APA is sedert 1999 onder private bestuur en het geen voorvereistes aan studente oor kerklidmaatskap, ras of kultuur nie. Die APA is ’n geregistreerde private akademie in tersiêre onderwys wat strewe na die ideaal van ’n vrye Christelike universiteit in Afrikaans.[4]
Ligging wysig
Die APA se kampus is geleë te Farenden Str. 430, Sunnyside, Pretoria. Die APA is by die Departement van Hoër Onderwys en Opleiding as ‘n privaat tersiêre onderwysinstelling geregistreer kragtens die Hoër Onderwyswet van 1997 onder die Registrasienommer 1999/HE08/001, en is 'n maatskappy sonder winsoogmerk.[5]
Kwalifikasies wysig
Die APA bied SCHOLA SCRIPTA, 'n kursus in Latyn, aan. Dit is ‘n korrespondensiekursus wat uit 4 modules bestaan.
Wat voorgraadse programme aanbetref word 'n Baccalaureus artium-graad, 'n BDIV-graad (Baccalaureus-graad in Teologie)[6] en vanaf 2024, 'n Baccalaureusgraad in Sosiale Wetenskappe (BSocSci), aangebied.[7]
Wat nagraadse studies aanbetref, bied die APA 'n NGOS (Nagraadse Onderwyssertifikaat) aan. Die doelwit van die sertifikaat is die opleiding van onderwysers vir die Senior- (Graad 7-9) en Verdere Onderrig- en Opleidingsfase (Graad 10-12).
Verwysings wysig
- ↑ https://www.apa.ac.za/ons-personeel/Besoek[dooie skakel] op 06/06/2019
- ↑ https://www.apa.ac.za/grondslag/Besoek[dooie skakel] op 06/06/2019
- ↑ https://www.apa.ac.za.Besoek[dooie skakel] op 06/06/2019
- ↑ https://www.apa.ac.za/grondslag/Besoek[dooie skakel] op 06/06/2019
- ↑ https://www.apa.ac.za.Besoek[dooie skakel] op 06/06/2019
- ↑ https://www.apa.ac.za/graad-programme/
- ↑ https://maroelamedia.co.za/goeiegoed/goeie-nuus/kom-studeer-sosiale-wetenskappe-in-afrikaans-by-ap-akademie/ Opgespoor en besoek op 23 Mei 2023