Allgemeiner Deutscher Nachrichtendienst

Die Allgemeiner Deutsche Nachrichtendienst (ADN) was naas Panorama DDR die enigste nuus- en fotoagentskap wat in die Duitse Demokratiese Republiek (DDR) amptelik toegelaat is. ADN het 'n monopolie op die voorsiening van nuus- en beeldmateriaal van landswye belang aan byna alle Oos-Duitse dagblaaie asook radio en televisie gehad. Nuus, berigte, artikels en foto's is met sowat sestig nuusagentskappe in ander lande uitgeruil sodat ADN in staat was om alle nuus, wat vir DDR-media bestem was, te filter.

Die hoofkantoor van ADN en ADN-Zentralbild in Mollstraße, Oos-Berlyn is in 1971 ingewy

ADN is amptelik deur die Ministerraad van die DDR bestuur, maar in die praktyk het die party-apparaat van die Sosialistiese Eenheidsparty van Duitsland (SED) toesig oor ADN gehou. Tot en met 1989 het ADN sowat 1 400 permanente personeel in diens gehad.

Geskiedenis

ADN is in Oktober 1946 met toestemming van die Militêre Sowjetadministrasie in Duitsland deur 'n aantal uitgewerye, koerante en radiostasies as GmbH (Duitse beperkte maatskappy) gestig. In April 1953 is ADN GmbH volgens 'n besluit van die SED-partyleierskap ontbind en in 'n staatsbeheerde nuusagentskap omgeskep. Die voorheen selfstandige fotoagentskap Zentrale Bildstelle Berlin is in 1956 by ADN ingesluit.

ADN se doelwitte en take as nuusagentskap het volgens sy statuut van 1966 uit die program en politieke doelwitte van die SED, die besluite van die Sentrale Komitee van die SED en die dekrete, verordenings en besluite van die Staatsraad en die Ministerraad van die DDR voortgespruit. Sy verslaggewing sou dus "aktueel" en "partydig" wees en 'n bydrae lewer tot die "ontwikkeling en verstewiging van die sosialistiese bewussyn in die land". Volgens Erich Honecker, sekretaris-generaal van die Sentrale Komitee van die SED en voorsitter van die DDR-Staatsraad, was ADN "ten nouste verbonde aan die suksesvolle ontwikkeling van ons Duitse Demokratiese Republiek, aan die stryd om sosialisme en vrede."

In die najaar van 1961, ná die bou van die Berlynse Muur, is ADN-medewerkers van lidmaatskap in die Wes-Duitse Bundespressekonferenz (BPK), 'n vereniging van professionele joernaliste, uitgesluit. Eers dertig jaar later is ADN-korrespondente ná die politieke omwenteling in die DDR in 1989 en die Duitse hereniging in 1990 weer as volwaardige lede deur die BPK aanvaar.

Tot in die laat 1970's is die sogenaamde Basisdienst ("basiese diens") van die ADN, wat deur die binne- en buitelandse afdelings saamgestel is, per teleks versprei. In 1979 het ADN na elektroniese teksverwerking en -oordrag oorgeskakel. Die nodige tegnologie hiervoor is deur die Amerikaanse maatskappy Omron verskaf.

In Mei 1992 is ADN, wat toe nog 254 permanente medewerkers in diens gehad het, aan die nuusagentskap Deutscher Depeschendienst (ddp) verkoop. Die histories waardevolle beeldargief van ADN-Zentralbild met sowat sewe miljoen foto's - 'n versameling wat tot in die beginjare van fotografie terugstrek - is by die Bundesarchiv ("Federale argief") in Koblenz ingesluit.

Literatuur

• Bundesminister für innerdeutsche Beziehungen (red.): DDR Handbuch. Bonn: Verlag Wissenschaft und Politik 1979