Amazon Kindle
Amazon Kindle [ˈʔæməzən 'kɪndl̩] is 'n produkreeks van e-boeklesers wat deur die Amerikaanse aanlynreus Amazon.com ontwerp en bemark word. Amazon Kindle-toestelle stel gebruikers in staat om elektroniese boeke, tydskrifte, dagblaaie en ander digitale media deur middel van draadlose netwerke aanlyn te koop, af te laai, deur te blaai en te lees.
Die Kindle-hardewareplatform is deur die Amazon-dogteronderneming Lab126 ontwikkel en aanvanklik op een enkele e-boekleser geïmplementeer wat vanaf November 2007 te koop was. Intussen is 'n hele reeks van Kindle-toestelle beskikbaar wat van e-boeklesers met elektroniese inkskerms tot tabletrekenaars met kleurskerms strek. Die aantal beskikbare e-boektitels in Amazon.com se aanlyn-boekwinkel het in Junie 2015 meer as 3,6 miljoen beloop, insluitende titels in Afrikaans.[1]