Andrew Beauchamp-Proctor

Andrew Frederick Weatherby Beauchamp-Proctor
	;
Bynaam(e)	Proccy
Geboortedatum	4 September 1894
Geboorteplek	Mosselbaai, Suid-Afrika
Sterfdatum	21 Junie 1921 (26 jaar oud)
Sterfplek	RAF Hendon, Engeland, Verenigde Koninkryk
Lojaliteit	Suid-Afrika
Diens/Tak	Suid-Afrikaanse Weermag; Royal Flying Corps
Jare in diens	1914-1915; 1917-1921
Rang	Vlugluitenant
Eenheid	Duke of Edinburgh's Own Rifles; No. 84 Squadron RAF
Veldslae/oorloë	Eerste Wêreldoorlog
Toekennings	Victoria Cross; Distinguished Service Order; Military Cross and Bar; Distinguished Flying Cross

Kapt. Andrew Beauchamp-Proctor (1894 - 1921) was 'n Suid-Afrikaanse vegvlieënier wat tydens die Eerste Wêreldoorlog met die Victoriakruis (VK) vereer is. Hy word in dieselfde asem genoem as Manfred von Richthofen (die "Rooi Baron") en Mick Mannock as 'n bobaasvlieënier.

Biografie

Andrew Frederick Weatherby (“Proccy”) Beauchamp-Proctor is op 4 September 1894 op Mosselbaai gebore en matrikuleer in Desember 1912 aan SACS in Kaapstad. Hy onderbreek sy studie in die ingenieurswese aan die Universiteit van Kaapstad om as vrywilliger aan die Duits-Suidwes-Afrika-veldtog deel te neem. In Augustus 1915 sit hy sy studie voort, maar in Maart 1917 is hy weer soldaat en ondergaan vlieëniersopleiding. Omdat hy maar 1.57m lank is, moes sy vliegtuigsitplek en die roerpedale aangepas word. Tussen 8 Augustus en 8 Oktober 1918 is hy in 26 luggevegte in Frankryk betrokke en vernietig 54 vyandelike vliegtuie en lugballonne. Op 8 Oktober is hy self raakgeskiet en is sy deelname aan die oorlog verby.

Sy unieke langafstandvisie maak van hom 'n besonder akkurate skut. Dit saam met sy uithouvermoë, vasberadenheid en durf besorg hom twee maal die MC, die militêre kruis. Koning George V het persoonlik die VC, DSO (Distinguished Service Order) en die DFC (Distinguished Flying Cross) aan hom toegeken. Hy was die enigste Suid-Afrikaner wat die VC in die Eerste Wêreldoorlog gewen het en die mees gedekoreerde Suid-Afrikaner ooit.

Terwyl hy vir 'n lugvertoning geoefen het, sterf hy op 21 Junie 1921 op die Salisbury Plain in Engeland. Tydens 'n staatsbegrafnis is hy op Mafikeng ter ruste gelê.

Bibliografie

Prisma, vol. 4 no. 7, Septembrer 1989.
(en) Biografie
www.delvillewood.com