Annanias Mathe
Annanias Mathe (c. 1976 – 27 Desember 2016[1]) was 'n berugte reeksverkragter en gewapende rower van Mosambiek. Hy word in 2006 bekend as die enigste persoon ooit om uit die C-Max-gevangenis in Pretoria te ontsnap. Mathe is aanvanklik in November 2006 op 51 aanklagte van moord, poging tot moord, verkragting, kaping en gewapende roof in hegtenis geneem.
| Annanias Mathe (ook gespel Ananias Mathe) | ||
| Gebore | 1976 | |
| Oorlede | 27 Desember 2016 | |
| Land | Suid-Afrika | |
| Bynaam | Suid-Afrika se 'Houdini' | |
| Misdaad | Verkragting, moord, diefstal | |
| Vonnisbesonderhede | ||
| Aangekeer | November 2006 | |
| Vonnisdatum | Desember 2009 | |
| Vonnis | 54 jaar | |
Ná sy inhegtenisname is Mathe in die A6-afdeling van C-Max aangehou, wat gevaarlike en geharde misdadigers huisves. Hy slaag daarin om te ontsnap deur homself met petroleumjellie te smeer en uit sy sel se venster, wat slegs 20 cm x 60 cm groot is, te gly. As gevolg hiervan het die pers hom as Suid-Afrika se 'Houdini' beskryf.[2] Hy het vroeër in April 2005 ook uit polisie-aanhouding ontsnap.
Met sy laaste ontsnapping is 'n landwye soektog van stapel gestuur, wat nougeset deur die plaaslike media gevolg is. Hy is weer op 4 Desember 2006 (sowat twee weke ná sy ontsnapping) aangekeer, toe hy 'n motor in die gegoede Johannesburgse voorstad van Craighall gekaap het. Die voertuig was met 'n opsporingstoestel toegerus, wat die polisie en privaat sekuriteitsmaatskappye na Mathe gelei het. Tydens sy inhegtenisname is hy drie keer in die been en in die boud geskiet.
Mathe is op 64 van 71 aanklagte van onder meer verkragting, poging tot verkragting, poging tot moord, roof en diefstal skuldig bevind.[3] Hy is tot 54 jaar gevangenisstraf, met 'n minimum van 43 jaar, gevonnis.[4] Ses bewaarders wat met sy ontsnapping verbind is, is ook afgedank.[5]
Mathe sterf op 27 Desember 2016 in aanhouding.[6] Hy was 40 jaar oud.
Verwysings wysig
- ↑ Ananias Mathe sentenced to 54 years behind bars
- ↑ "Article". The Washington Post. 4 Desember 2006. Besoek op 3 Januarie 2011.[dooie skakel]
- ↑ http://www.thetimes.co.za/News/Article.aspx?id=1011773[dooie skakel]
- ↑ "Mathe gets 54 years in jail". News24 (in Engels). 8 Desember 2009. Geargiveer vanaf die oorspronklike op 31 Januarie 2010. Besoek op 3 Januarie 2011.
- ↑ "Six dismissed for helping Mathe". News24 (in Engels). 9 Desember 2009. Geargiveer vanaf die oorspronklike op 14 Januarie 2010. Besoek op 3 Januarie 2011.
- ↑ SA's most notorious criminal Ananias Mathe has died