Antoni Wit

Antoni Wit (* 7 Februarie 1944, Krakow – ) is 'n Poolse dirigent. Hy is een van die mees vooraanstaande Poolse dirigente, en het saam met Henryk Czyz by die Akademie van Musiek te Krakow gestudeer. Hy het daarna sy musikale studies voortgesit by Nadia Boulanger in Parys. Hy het ook 'n regsgraad behaal by die Jagielloniese Universiteit in Krakow.

Antoni Wit

Onmiddellik nadat hy sy studies voltooi het is hy aangestel as assistent by die Warskou Filharmoniese Orkes deur Witold Rowicki. Nadat hy die tweede prys gewen het tydens die Internasionale Herbert von Karajan Dirigeerkompetisie in Berlyn in 1971 het hy assistent-dirigent geword tot die beskermheer van die kompetisie. Later was hy aangestel as dirigent van die Poznań Filharmoniese Orkes, en het hy met die Warskou Teater saamgewerk. Vanaf 1974 tot 1977 was hy artistieke direkteur van die Pomeranse Filharmoniese Orkes; voor sy aanstelling as direkteur van die Poolse Radio- en Televisie-orkes en -koor vanaf 1977 tot 1983.

Van 1983 tot 2000 was hy die besturende en artistieke direkteur van die Poolse Nasionale Radiosimfonieorkes in Katowice, en van 1987 tot 1992 die hoofdirigent en toe die Eerste gasdirigent van die Orquesta Filarmónica de Gran Canaria. In 2002 het hy die besturende en artistieke direkteur van die Warskou Filharmoniese Orkes en Koor geword. Hy is sedert die 2010/11-seisoen die Eerste gasdirigent van die Orquesta Sinfónica de Navarra in Pamplona.

Sy internasionale loopbaan het samewerkingsgeleenthede met talle groot orkeste regoor Europa, die Amerikas en die Verre-Ooste ingesluit. Hy het reeds oor die 200 plate-opnames gemaak, insluitende 'n bekroonde vrystelling vir Naxos van die klavierconcertos van Prokofiëf wat die Diapason d’Or en Grand Prix du Disque de la Nouvelle Académie du Disque gewen het. In Januarie 2002 het sy opname van die Turangalîla Simfonie deur Olivier Messiaen die Cannes Klassieke Toekenning tydens die MIDEM Classic 2002 gewen.

In 2004 het hy die "Classical Internet Award" gewen. Hy het vir Naxos 'n CD-reeks van Szymanowski se simfoniese; en grootskaalse vokaal-instrumentale werke opgeneem, wat elk onder die discs of the month plate gelys is deur Gramophone en die BBC Music Magazine. Hy het ook die Record Academy Award 2005 van die Japannese musiektydskrif Record Geijutsu gewen vir Penderecki se Poolse Mis (opgeneem op Naxos), asook vier Fryderyk Toekennings van die Poolse Fonografiese Akademie. Hy het ses Grammy nominasies vir Penderecki se Sint Luke Passie in 2004, 'n Poolse Mis in 2005, Sewe Hekke van Jerusalem in 2007, Utrenja in 2009, en Karol Szymanowski se Stabat Mater in 2008 en Simfonieë Nos. 1 en 4 in 2009 ontvang.

In 2010 het Wit die jaarlikse toekenning van die Karol Szymanowski-stigting ontvang vir sy bevordering van die musiek van Szymanowski deur sy Naxos-opnames. Wit is 'n professor by die Fryderyk Chopin Universiteit van Musiek in Warskou.