Armagnac (party)

(Aangestuur vanaf Armagnac (Party))

Die Armagnac party was 'n vername groepering in die Franse politiek en oorlogvoering tydens die Honderdjarige Oorlog. Die Armagnacs was in 'n jare lange stryd gewikkel met die Boergondiërs. Die vyandskap het sy oorsprong in 'n ou vete tussen die Hertog van Orléans en die Hertog van Boergondië. Die Armagnacs was bondgenote van Karel, Hertog van Orléans teen Jan sonder Vrees, die Hertog van Boergondië nadat Lodewyk van Valois, Hertog van Orléans, Karel se vader, op bevel van die Hertog van Boergondië vermoor is in 1407. Die suide en weste van Frankryk was oorwegend Armagnac gesind terwyl die noorde en ooste Boergondies was. [1]

Karel, Hertog van Orléans wat 'n eerbetoning van 'n vasal ontvang

Die party se naam is afkomstig van Karel se skoonvader Bernard VII, Graaf van Armagnac, wat die hertog tydens sy jeug gelei het en finansiering en Gaskonse troepe verskaf het wat Parys beleër het voor hulle by Saint Cloud verslaan is. Later is Jan sonder Vrees na sy gebied in die ooste teruggestuur en Bernard van Armagnac het in Parys agtergebly. Hy is in 1418 in 'n sluipmoord doodgemaak.

Sporadiese gevegte het vir 'n aantal jare tussen die Armagnacs en Boergondiërs voortgeduur. Die Boergondiërs het hulle by die Engelse aangesluit in 1419 en die Armagnacs het betrokke geraak by die saak van Karel VII. Die faksie stryd was teen die tyd skaars onderskeibaar van die Koninklike stryd tussen die Franse en Engelse monargieë. Die terme het in gebruik gebly tot dit deur Karel VII verbied is na aan die einde van die Honderdjarige Oorlog as deel van 'n poging om die wonde tussen die groepe te heel.

Kyk ook wysig

Boergondiërs (party)

Verwysings wysig

  1. Vita Sackville-West, Saint Joan of Arc,
  • Hierdie artikel, of gedeeltes daarvan, is uit die volgende Wikipedia-artikel vertaal: Armagnac (party), spesifiek van hierdie weergawe. Die vertaling is op 1 Desember 2007 gedoen