Balmoral-kasteel

Balmoral-kasteel is ’n groot landgoedwoning in Aberdeenshire, Skotland. Die landgoed is in 1852 teen £30 000 deur koningin Victoria se man, prins Albert, gekoop en is steeds ’n gewilde koninklike somerwoning.

Balmoral-kasteel.

Die Balmoral-landgoed het deur die jare in die koninklike familie se besit uitgebrei tot meer as 20 000 hektaar. Daar is tans 50 heeltydse en 50 tot 100 deeltydse personeellede.

Geskiedenis

Die oorspronklike huis is in 1390 deur sir William Drummond gebou. Dit het voorheen aan Robert II van Skotland (1316–1390) behoort wat ’n jaghuis in die gebied gehad het. In die 15de eeu is die landgoed verkoop aan Alexander Gordon, die 3de Graaf van Huntly. In 1662 is dit verkoop aan die Farquharsons van Invery, wat dit in 1798 aan die 2de Graaf van Fife verkoop het. Die landgoed het in 1822 deel gevorm van die kroningsbedrywighede van koning George IV. Nadat prins Albert dit gekoop het, het hy die kasteel dadelik laat vergroot. Die groter kasteel is in 1856 voltooi.

Balmoral en Sandringham House is die private eiendom van die Britse koninklike familie en nie deel van hul amptelike besittings nie. Een van die belangrikste dele van die landgoed is die Ballochbuie-woud van sowat 1 000 hektaar. Koningin Victoria het dit in 1878 gekoop om dit van ’n houthandelaar te red en dit bevat nou een van die grootste oorblywende inheemse Skotse dennehoutplantasies in die land.

Balmoral is een van die grootste toeriste-attraksies in die gebied. Sowat 85 000 mense besoek die kasteel en tuine elke jaar.

In moderne kultuur

Die koningin het in Balmoral-kasteel tuisgegaan tydens die dood van Diana, Prinses van Wallis in 1997. Haar aanvanklike besluit om nie na Londen terug te keer en meer openlik te rou nie het haar baie kritiek op die hals gehaal. Haar private gesprekke met premier Tony Blair is voorgestel in die Stephen Frears-rolprent The Queen (2006). Die kasteel kom ook voor in die 1997-rolprent Mrs. Brown, maar dit is deur Duns-kasteel aan die Skotse grens vervang.

Koningin Elizabeth is op 8 September 2022 in die kasteel oorlede, nadat sy byna 70 jaar op die Britse troon regeer het.

Verwysings

• Touristik Führer Schottland, kennen und lieben, 1990 LN Verlag Lübeck, ISBN 3-87498-402-8
• Highlands, Kilts und Dudelsäcke, Reisehandbuch Schottland, Iwanoski’s Reiseverlag, Dormagen 1997, ISBN 3-923975-50-3
• Scotland – When will you go?, Scottish Tourist Board, Edinburg, 1998
• Schottland – Sehenswürdigkeiten, British Tourist Authority, Londen, 1998
• HB Bildatlas, Schottland, Springer Verlag, Hamburg, 2005

Eksterne skakels

• Balmoral-kasteel – amptelike webtuiste
• Tom Weir besoek Balmoral – video van ScotlandonTV Geargiveer 1 Februarie 2009 op Wayback Machine

• Wikimedia Commons het meer media in die kategorie Balmoral-kasteel.

Hierdie artikel is merendeels vertaal vanaf die Engelse Wikipedia-artikel en:Balmoral Castle