Barrie Biermann
Prof. Barrie Bierman(n) (1924–1991) was 'n Suid-Afrikaanse argitek en kampvegter vir die bewaring vir Suid-Afrika se argitektoniese erfenis.[2]
Barrie Biermann | |
|---|---|
| Gebore | Barrie Ebenezer Biermann 22 Desember 1924[1] |
| Sterf | 29 Maart 1991 |
| Nasionaliteit | Suid-Afrika |
| Beroep | Argitek |
| Bekend vir | Veg vir S.A. se argitektoniese erfenis |
| Titel | Professor |
Biermann is in Tweespruit in die Vrystaat gebore en het ook daar skoolgegaan. Hy studeer argitektuur aan die Universiteit van Kaapstad, waar hy sy doktorsgraad verwerf. Daarna het hy vir 37 jaar as lektor in die Argitektuurgeskiedenis en later hoogleraar aan die Universiteit van Natal gedien.
Hy het in die sestiger- en sewentigerjare verbete teen ontwikkelaars wat Constantia wou onderverdeel en herontwikkel geveg. Hy het selfs die destydse administrateur, mnr. J.N. (Nico) Malan in Die Burger aangevat omdat hy die ontwikkelaars gesteun het. Die behoud van Constantia as landelike omgewing is grootliks aan sy ywer te danke.
Hy het in Kaapstad voor die Suid-Afrikaanse Akademie vir Wetenskap en Kuns gesê: 'n Vloek rus op die arbeid van die sloper. Volgens hom is die Bo-Kaap, 'n opelug-museum van die land se argitektoniese ontwikkeling. Dit is dus iets wat vir die nageslag bewaar moet word.
Prof. Biermann was ook die skrywer van 'n aantal kundige verslae en artikels vir veral argitektuur-tydskrifte. Sy boek, Boukuns in Suid-Afrika, geniet steeds groot aansien onder bewaringskundiges.
Sy eie woonhuis in Durban was ’n eenvoudige huis met ’n binnehof, aangepas by en in harmonie met die subtropiese KwaZulu-Natalse klimaat.[3]
Van sy werke
wysig- Boukuns in Suid-Afrika – 'n beknopte oorsig van ons boustyle en bouwyse; geskryf en afgebeeld deur B. E Bierman; Kaapstad: Balkema, 1955
- Rooiwyn in Suid-Afrika deur Barrie Biermann; Kaapstad: Buren, 1971
- Built form and culture: essays in honour of James Walton
Verwysings
wysig- ↑ Dis Vrydag, 22 Desember, die 357ste dag[dooie skakel], Die Burger, 22 Desember 2000
- ↑ Doyen van argitekte in sy huis dood aangetref, Die Burger, 6 April 1991
- ↑ HAT Taal-en-feitegids, Pearson, Desember 2013, ISBN 978-1-77578-243-8