Barry Richter
Bernhard Wilhelm Richter (16 Augustus 1878, Dewetsdorp – 6 Julie 1961, Bellville), beter bekend as Barry Richter, was tydens die Tweede Vryheidsoorlog die hoofadjudant van genl. Christiaan de Wet.[1]
Richter was bekend vir sy dapperheid[1] en het onder meer gehelp om die lewe van Klasie Havenga, later Suid-Afrika se Minister van Justisie, te red. Die Boere het die treinspoor tussen twee blokhuise in die nag oorgesteek nadat hulle die sperdrade geknip het. Ná die tyd is Havenga vermis en Richter het onder kruisvuur en soekligte deurgekruip om die swaar gewonde soldaat te gaan haal en hom op sy rug na veiligheid te dra.[2]
Met die beleg van Dewetsdorp deur die Engelse het lt. Cecil Boyle 'n skrikbewind gevoer deur die vroue en kinders met 'n sweep aan te ja na konsentrasiekampe. Genl. De Wet het hiervan gehoor en in November 1900 besluit om Dewetsdorp te ontset. Hy het Richter opdrag gegee om twee ander saam te vat en Boyle in die nag in hegtenis te neem sodat hy nie opdragte aan sy soldate kan gee wanneer die Boere die dorp binneval nie. Dit het hulle gedoen, en Boyle en ’n klompie ander Britse soldate gevange gehou tot die Boere die dorp die middag van 20 November bevry het.[3]
Richter het ná die oorlog in Dewetsdorp geboer. Hy en sy vrou, Bessie Wiese, het vier kinders gehad: Bernie, Bettie, Marge en Toby.
Verwysings
wysig- ↑ 1,0 1,1 Richter het nooit geweifel om De Wet se opdragte uit te voer[dooie skakel] Die Volksblad, 5 November 1999
- ↑ Genl. De Wet se adjudant oorlede, Die Volksblad, 6 Julie 1961
- ↑ Boyle moes toe self loop soos die vroue en kinders[dooie skakel] Die Volksblad, 8 Oktober 1999