Bereapark
Bereapark in Pretoria is bekend as 'n voormalige krieketveld, veral vanweë die Noord-Transvaalse Krieketspan wat hier wedstryde gespeel het. Hier was egter ook 'n rugby- en 'n sokkerklub wat die geriewe gebruik het. Die klubhuis en sportterrein is geleë in Lilian Ngoyistraat (vroeër Van der Waltstraat) naby Pretoria se middestad.
| Bereapark | ||
| Ligging | Lilian Ngoyistraat, Pretoria | |
|---|---|---|
| Koördinate | 25°45′29.09″S 28°11′37.54″O / 25.7580806°S 28.1937611°O | |
| Oppervlak | Gras | |
| Konstruksie | ||
| Huurders | ||
| Eertydse Noord-oos-Transvaalse Krieketspan | ||
Sportvelde
wysigIn September 1882 is beesweiding, wat slegs 'n paar minute weg was van Kerkplein in Pretoria met 'n perdekar, geïdentifiseer as 'n krieketveld vir Pretoria se krieketspelers. Die grond het destyds aan 'n weduwee Hoffman behoort en was deel van 'n plaas wat Fonteinedal ingesluit het. Teen die tyd dat die besoekende Walter Read Elftal van Engeland Suid-Afrika in 1892 besoek het, het die veld reeds as Bereapark bekend gestaan.
'n Pretoriase span het teen die Engelse besoekers gespeel. Dit was die eerste internasionale krieketwedstryd in Pretoria, wat toe nog die hoofstad van die Zuid-Afrikaanse Republiek (ZAR) was. Die Pretoriase span het uit 22 spelers bestaan teenoor die Walter Read-span se 11. In die wedstryd, wat op 29 en 30 Januarie 1892 plaasgevind het, is die Pretoriase span met 'n beurt en 29 lopies geklop. In die 1906/07 seisoen het die krieket Curriebeker-toernooi in Johannesburg en Pretoria plaasgevind en die eerste eersterangse krieketwedstryde het hier plaasgevind. Die Noord-Transvaalse krieketspan het die sportgronde gebruik as tuisveld vanaf 1937/38 tot 'n nuwe sportstadion in 1984/85, naamlik Centurionpark, gebou is.
In 1897 is die eerste klubhuis op die perseel gebou. Die eerste motorvoertuig in Suid-Afrika is ook in dieselfde jaar op Bereapark uitgestal. President Paul Kruger van die ZAR het tydens die geleentheid 'n toespraak gelewer.
In 1903 is Bereapark aan die Suid-Afrikaanse Vervoerdienste verkoop en spoorwegpersoneel het die perseel se sportgeriewe gebruik. Die klubhuis is as 'n biblioteek, musiekkamer en kroeg gebruik. Die suidelike klubhuis is in 1907 gebou, terwyl die noordelike klubsaal in 1926 bygevoeg is. Die Berea Rugbyklub is in dieselfde jaar gestig. 'n Sokkerspan, die Pretoria Suid-Afrikaanse Spoorwegspan, het die veld ook as tuisveld begin gebruik in 1918 en sedert 1935 as die Berea Football Club in die destydse Transvaal Sokkerliga meegeding.
Brand
wysigIn die 1990’s is die gebou as administratiewe en konferensiefasiliteit gebruik, maar daarna het die gebou en gronde begin verval. 'n Gekombineerde laer- en hoërskool is uit die gebou bedryf, totdat 'n brand in April 2010 groot skade aangerig het. Sedertdien het die terrein en die klubhuis totaal verval en word glad nie gebruik nie.