Bernardo Provenzano
Bernardo Provenzano (31 Januarie 1933 – 13 Julie 2016) was ’n lid van die Sisiliaanse Mafia en is daarvan verdink dat hy die baas was van die Corleonesi, ’n Mafiafaksie wat op die dorp Corleone ontstaan en ander families oorgeneem het, en dus die capo di tutti capi (baas van base) van die hele Sisiliaanse Mafia tot met sy inhegtenisneming in 2006.
| Bernardo Provenzano | ||
| ||
| Provenzano in 1959. | ||
| Gebore | 31 Januarie 1933 Corleone, Sisilië, Italië | |
| Oorlede | 13 Julie 2016 (op 83) Milaan, Italië | |
| Rede vir dood | Blaaskanker | |
| Land |  Italië
| |
| Bynaam | Binnu u Tratturi ("Bernie die Trekker") Zio Binnu ("Oom Bernie") Il Ragioniere ("Die Rekenmeester") | |
| Beroep | Mafioso | |
| Misdaadbesonderhede | ||
| Misdaad | Mafiabande Verskeie moorde Ontsnapping | |
| Beweging | Sisiliaanse Mafia | |
| Voorganger | Salvatore Riina | |
| Opvolger | Matteo Messina Denaro | |
| Vonnisbesonderhede | ||
| Vonnis | Lewenslange tronkstraf (verskeie lewenslange vonnisse vir verskeie moord) | |
| Status | Oorlede | |
Sy byname was Bernie die Trekker omdat hy, in die woorde van een informant, mense "in die grond in geploeg het";[1] oom Bernie; en Die Rekenmeester vanweë die stil en subtiele manier waarop hy sy misdaadryk beheer het, ten minste in vergelyking met van sy gewelddadige voorgangers.[1][2]
Mafialoopbaan
wysigTydens die bewind van Salvatore Riina as baas van base het Provenzano vermoedelik agter die skerm gewerk en die finansiële sy van die Mafia se bedrywighede beheer, veral heroïensmokkelary.
Riina is in Januarie 1993 in hegtenis geneem en tot lewenslange tronkstraf gevonnis vir tientalle moorde, insluitende dié op die anti-Mafiamagistrate Giovanni Falcone en Paolo Borsellino wat die Maxiverhoor van Mafialede in die middel 1980's begin het. Provenzano het hom toe opgevolg as baas van base.[3] Onder sy leierskap het die Mafia minder bloeddorstig geword en die veldtog van geweld is vervang met ’n veldtog van stilte bekend as die Pax Mafiosa.
Hy het risiko's vermy en, in plaas daarvan om die telefoon te gebruik, sy bevele met klein handgeskrewe aantekeninge uitgedeel.[2] Hy het baie van sy aantekeninge met Christelike seëninge afgesluit[2] en sy optrede het al hoe godsdienstiger geraak. Hy het Bybelverse onderstreep en in sy aantekeninge gebruik. Hy het ook dikwels na God verwys en gesê "mag Hy ons help om die regte ding te doen" of "met God se wil".[4]
Inhegtenisneming
wysigProvenzano was ’n voortvlugtige vandat hy in 1963 aan moord skuldig bevind is tot met sy arres in 2006. Hy was vir ’n rekord van 43 jaar voortvlugtig. Toe hy in hegtenis geneem is, was hy net bekend volgens foto's uit die 1950's; die laaste bekende foto is in 1959 geneem.[5]
Op 25 Januarie 2005 het die polisie ’n strooptog op verskeie huise in Sisilië uitgevoer en 46 Mafiaverdagtes in hegtenis geneem wat daarvan verdink is dat hulle Provenzano help om die owerhede te vermy.[6] Hoewel hulle hom nie gevang het nie, het die polisie van sy handgeskrewe notas gevind, wat bewys het die 72-jarige Provenzano is steeds lewend en in beheer van die Mafia. Twee maande later is nog 80 mafiosi aangekeer, maar weer was Provenzano nie onder hulle nie.[7]
Provenzano is eindelik op 11 April 2006 naby sy huis in Corleone gearresteer.[8][1][9][10]
Dood
wysigHy is op 13 Julie 2016 op 83-jarige ouderdom in die hospitaal van sy tronk in Milaan dood weens komplikasies van blaaskanker.[11]
Verwysings
wysig- ↑ 1,0 1,1 1,2 Profile: Bernardo Provenzano, BBC News, 11 April 2006.
- ↑ 2,0 2,1 2,2 Sicily's Invisible Man Geargiveer 15 September 2005 op Wayback Machine, Time Europe Magazine, 29 Augustus 2004.
- ↑ Dickie, John (2007). Cosa Nostra: A History of the Sicilian Mafia. Hodder. ISBN 978-0-340-93526-2.
{{cite book}}: Ongeldige|ref=harv(hulp) - ↑ Merlino, Rossella (2012). "'Con il volere di Dio': Bernardo Provenzano and religious symbolic ritual". Modern Italy. 17 (3): 365–381. doi:10.1080/13532944.2011.611492.
- ↑ "Gangster No 1". The Guardian. 24 April 2001.
- ↑ "Anti-mafia raids net 46 suspects", BBC News, 25 Januarie 2005.
- ↑ "Sicilian police arrest 84 Mafiosi in raids on capital" Geargiveer 24 Desember 2007 op Wayback Machine, The Telegraph, 8 Maart 2005.
- ↑ "'Top Mafia boss' caught in Italy", BBC News, 11 April 2006.
- ↑ "Italy's 'top Mafia boss' is arrested" Geargiveer 17 Mei 2006 op Wayback Machine, Independent Aanlyn, 11 April 2006.
- ↑ (it) Arrestato il boss della mafia Bernardo Provenzano Geargiveer 12 April 2006 op Wayback Machine, Polizia di Stato, 11 April 2006.
- ↑ "Italian mafia boss Bernardo Provenzano, 83, dies in jail". bbc.co.uk (in Engels). Geargiveer vanaf die oorspronklike op 15 April 2019. Besoek op 13 Julie 2016.
Eksterne skakels
wysig- (it) ’n Biografie van Provenzano
- The Guardian: "Gangster No 1", 24 April 2001
Hierdie artikel is vertaal uit die Engelse Wikipedia
