Bevrediging van Gent
Die Bevrediging van Gent (Nederlands: Bevrediging van Gent of Pacificatie van Gent) was 'n verdrag wat deur die onderlinge Nederlandse provinsies op 8 November 1576 in Gent onderteken is. Hiervolgens sou hulle 'n sogenaamde Generale Unie vorm met die doel om die Spaanse mag in die Nederlande teen te staan en omver te werp. Die direkte aanleiding tot die verdrag was die Spaanse Furie op 4 November 1576, waartydens Spaanse huursoldate Antwerpen geplunder het weens agterstallige betaling. Hierdeur is die anti-Spaanse stemming in die Lae Lande versterk.
