Boesmanland
Die Boesmanland is 'n streek in die Noord-Kaap, Suid-Afrika. Die streek strek vanaf Calvinia in die suide tot by die Oranjerivier in die noorde en ooste, Namakwaland in die weste en die Sakrivier en die Hartbeesrivier in die ooste.[1]
Die dorpe Brandvlei, Pofadder en Aggeneys, asook gehuggies soos Namies en Bosluispan, lê in Boesmanland. Die landskap bestaan uit uitgebreide vlaktes wat deur inselberge, soos Gamsberg, onderbreek word. Die naam van die streek is van sy eertydse inwoners, die Boesmans (San-bevolkingsgroep), wat steeds daar aangetref word, afgelei.[2]
Die Sishen-Saldanha-spoorlyn loop deur die Boesmanland. Vaalputs, waar kernafval gestoor word, is tussen Boesmanland en Namakwaland geleë.
Klimaat
wysigBoesmanland is 'n dor en droë gebied grensend aan Namakwaland. Dit is waarskynlik die mees onherbergsame streek in Suid-Afrika. Die grond is grotendeels onvrugbaar en die grondwater het 'n hoë soutgehalte. Die flora en fauna, hoewel skaars, is van groot belang. Hoewel die veld te dor is om te bloei (soos aan die weskus van Namakwaland), selfs nie wanneer dit in die lente reën nie, is plantjies wat opkom ongewoon en dikwels van asemrowende skoonheid.
Sien ook
wysig- Lys van streeksname in Suid-Afrika
- Boesmanland (bantoestan), voormalige tuisland in die noordooste van Suidwes-Afrika.
Verwysings
wysig- ↑ HAT Taal-en-feitegids, Pearson, Desember 2013, ISBN 978-1-77578-243-8
- ↑ Die Suid-Afrikaanse Gids: feite en wenke. Isabel Uys. 2009 ISBN 978-1-86919-324-9