Bolus Herbarium

Die Bolus Herbarium is 'n herbarium by die Universiteit van Kaapstad wat uit 350 000 plantspesies bestaan.

Die Bolus Herbarium by die Universiteit van Kaapstad

Binnekant van die Bolus Herbarium

Geskiedenis

Dr. Harry Bolus, (1834–1911), 'n ryk Kaapstadse sakeman, het sy versameling in 1865 in Graaff-Reinet begin, en dit is nou die oudste funksionerende herbarium in die land. Ná sy dood het die Suid-Afrikaanse Kollege (sedert 2 April 1918 die Universiteit van Kaapstad) sy herbarium, 'n biblioteek bestaande uit duur, unieke en vroeë boeke oor die botanie en 'n aansienlike bedrag geld vir die onderhoud en die uitbou van die versameling geërf. In 1924 is 'n spesiale gebou in Kirstenbosch vir die herbarium gebou, maar dit het naderhand nie geskik geblyk nie. Daarom is die herbarium in 1938 na die kampus verskuif. Dr. Louisa Bolus, Harry se niggie, was tot met haar dood in 1970 ook aan die herbarium verbonde.

Doel

Navorsing en onderrig in botanie en ekologie by die herbarium dek 'n wye veld. Dit fokus op aspekte van die Kaapse flora soos taksonomie, inheemse plante, biogeografie en sistematiek en evolusie. Wetenskaplikes van oor die hele wêreld gebruik hierdie herbarium vir hul navorsing.

Spesiale versamelings

Onder die verskeie besondere versamelings plante in die herbarium is die bekendste dr. Harry Bolus se orgideë en erikas, dr. H.M.L. (Lulu) Bolus se mesembryanthemae, dr. Ave Duthie se swamme en Henri Georges Fourcade se blomplante uit die streek van Humansdorp tot George.

Bemakings

Verskeie plantkundiges het hul versamelings flora en boeke aan die Bolus Herbarium bemaak. Onder hulle is dr. C. Louis Leipoldt in 1946, H.G. Fourcade in 1948 en genl. J.C. Smuts in 1950.

Publikasies

Tussen 1915 en 1928 is 4 dele van die Annals of the Bolus Herbarium gepubliseer. Later het die Contributions from the Bolus Herbarium verskyn.

Bibliografie

• Floyd, K.B.: The Bolus Herbarium. University of Cape Town. Lantern, tydskrif vir kennis en kultuur. Jaargang 23, nr. 1, September 1973.
• Standard Encyclopaedia of Southern Africa, verskeie dele. Kaapstad: Nasou. 1970–1976.

Eksterne skakels

• Amptelike webtuiste van die Bolus Herbarium Geargiveer 30 Junie 2012 op Wayback Machine