George

Stad in die provinsie Wes-Kaap, Republiek van Suid-Afrika

George is 'n stad in die provinsie Wes-Kaap, Republiek van Suid-Afrika, aan die suidekant van die Outeniekwaberge, met sowat 157 400 inwoners.

George
Die NG Moederkerk in George
Die NG Moederkerk in George
George is in Wes-Kaap
George
George
 George se ligging in Wes-Kaap
Koördinate: 33°58′S 22°27′O / 33.967°S 22.450°O / -33.967; 22.450Koördinate: 33°58′S 22°27′O / 33.967°S 22.450°O / -33.967; 22.450
LandVlag van Suid-Afrika Suid-Afrika
ProvinsieWes-Kaap
DistrikTuinroete
MunisipaliteitGeorge
Stigting1811[1]
Regering
 • BurgemeesterLeon van Wyk (DA)
Oppervlak
 • Totaal83,8 km2 (32,4 vk. myl)
Bevolking
 (2011)[2]
 • Totaal157 394
 • Digtheid1 878/km2 (4 860/vk. myl)
Rasverdeling (2011)
 • Wit mense18.6%
 • Indiërs/Asiërs0.5%
 • Bruin mense47.4%
 • Swart mense32.3%
 • Ander1.2%
Taal (2011)
 • Afrikaans 63.1%
 • Xhosa 25.8%
 • Engels 7.8%
 • Ander 3.2%
Poskode (strate)
6530
Skakelkode044
Webwerfwww.george.org.za

George lê aan die kus sowat 300 km oos van Kaapstad aan die bekende Tuinroete. George is die ekonomiese hoofstad van die Tuinroete. In die omgewing lê toeristetrekpleisters soos die wye strande Heroldsbaai, Victoriabaai en Wildernis, die volstruisdorp Oudtshoorn en Knysna met sy lagune, sedert Maart 2009 deel van die Tuinroete Nasionale Park.

Die inheemse woude met majestueuse ou geelhoutbome en ander boomsoorte, die pragtige fynbos met tientalle soorte proteas, ericas en heide en 'n groot verskeidenheid varingsoorte trek toeriste en vakansiegangers wat lief is vir die buitelewe en natuurskoon.

George is bekend om sy uitstekende gholfbane (daar is drie verskillende 18-putjie bane op die Fancourt-landgoed alleen) en die geskiedkundige Montagupas oor die Outeniekwaberg (geopen in 1847).

Geskiedenis wysig

Hoewel George, wat oorspronklik as George Town bekend gestaan het, eers in 1778 gestig is, het die eerste boere en houtkappers reeds vroeër daar gevestig.[3] Volgens historiese dokumente het hierdie pioniers 'n houtkapperspost aan die voet van die Outeniekwaberge gestig toe die destydse owerheid met die ontginning van die welige inheemse woude begin het.

George Town, die eerste distrik, is op 23 April 1811 deur die destydse Britse goewerneur Caledon geproklameer. Die naam het die destydse monarg George III vereer. Adrianus (Jan) van Kervel is as die eerste landdros aangestel. Van Kervel het sy stempel op die dorp afgedruk met die beplanning van die straatuitleg.

Die NG moedergemeente is in 1812 gestig. Die eerste predikant was ds. T.J. Herhold, na wie die dorpie Herold en die vakansieoord Heroldsbaai genoem is. Die historiese NG Moederkerk van George is in 1842 ingewy en is tans een van die dorp se grootste toeriste-aantreklikhede. Die klipkerk in Pacaltsdorp is die sesde oudste kerk in Suid-Afrika, terwyl die Rooms Katolieke kerk Ss.Peter and Paul die oudste Katolieke kerk in Suid-Afrika is.

Die eerste plaaslike owerheid is in 1837 verkies en die dorp het in 1884 volle munisipale status verkry.[4] In 1907 is George per spoorlyn met Kaapstad en Oudtshoorn verbind, en in 1947 het paaie ontstaan wat die dorp met alle hoofsentrums in Suid-Afrika verbind. Die dorp het vervolgens al hoe gewilder geraak as vakansieoord en as sentrum vir konferensies, kongresse en saamtrekke.

Wapens wysig

Munisipaliteit (1) — Teen 1931 het George se munisipale raad 'n skynheraldiese "wapen" in gebruik geneem, waarop 'n rooi kruis vergesel van 'n landskaptoneel, 'n loerie, rooi berglelies en 'n eikeboom uitgebeeld word. 'n Bosbok staan bo die skild. Die wapenspreuk was "Semper amabile".[5]

Munisipaliteit (2) — Die College of Arms (in Londen) het in 1958 'n behoorlike wapen aan die munisipaliteit verleen: Gevierendeel van rooi en silwer, 'n kruis, kruislings verdeel van die een in die ander, in die eerste kwartier vergesel van 'n silwer galopende perd, in die tweede kwartier van 'n Knysnaloerie sittend op 'n skuinslinksgeplaaste tak, in die derde kwartier van 'n gestingelde en geblaarde proteablom, alles van natuurlike kleur, en in die vierde kwartier van 'n silwerbevrugte eikeboom, die stam afgesnede. Die helmteken was 'n bosbok, en die wapenspreuk het "Semper amabile" gebly. Hierdie wapen is in 1994 by die Buro vir Heraldiek geregistreer.[6] Die wapen is deur Ivan Mitford-Barberton en H. Ellis Tomlinson ontwerp.

Afdelingsraad — George se afdelingsraad (d.w.s. die plaaslike owerheid vir die landelike gebiede buite die dorpsgrense) het in 1962 'n wapen by die Kaapse Provinsiale Administrasie geregistreer: In groen, 'n skildvoet golwend gedwarsbalk van silwer en blou en 'n hoekige silwer skildhoof belaai met drie gestingelde en geblaarde appels van natuurlike kleur. Die helmteken was 'n proteablom; die skildhouers was twee bosbokke; en die wapenspreuk was "Regio melle dulcior".[7] Die wapen is deur Schalk Pienaar ontwerp.

Landbou wysig

George staan as die hart van die Tuinroete bekend. Die Suid-Afrikaanse hopsbedryf is hier gesetel. Met sy Mediterreense klimaat en voldoende reën regdeur die jaar is die dorp uiters geskik vir die aanplanting van hierdie belangrike bestanddeel in die bierbrouproses. Die enigste brouery in die omgewing is in Knysna te vinde.

Infrastruktuur wysig

George beskik oor 'n lughawe wat dit regstreeks verbind met die groot stede soos Kaapstad, Bloemfontein en Johannesburg. Teen 2018 bedien die lughawe reeds meer as 700 000 toeriste en sakemanne jaarliks. Die dorp is padlangs verbind met Kaapstad en Port Elizabeth met die N2 nasionale pad. Die N12 verbind George via die Outeniekwapas met die binneland. Daar is ook 'n spoorlyn wat George met Mosselbaai en Oudtshoorn verbind. Die spoorlyn vanaf Kaapstad het die dorp in 1907 bereik.

Onderwys wysig

Van die skole in George sluit in:

Besienswaardighede wysig

Susterstede wysig

Sien ook wysig

Fotogalery wysig

Verwysings wysig

  1. "Chronological order of town establishment in South Africa based on Floyd (1960:20-26)" (PDF) (in Engels). pp. xlv–lii. Geargiveer (PDF) vanaf die oorspronklike op 13 Julie 2019. Besoek op 17 Januarie 2016.
  2. 2,0 2,1 2,2 2,3 Som van die hoofplekke George en Thembalethu 2011-Sensus.
  3. Artikel uit Die Burger, in: Suid-Afrikaanse Oorsig, 20 Junie 1986, bl. 560
  4. Erasmus, B.P.J. (1995). Op Pad in Suid-Afrika. Jonathan Ball Uitgewers. ISBN 1-86842-026-4.
  5. Die wapen kom voor op 'n tabakkaart wat in 1931 uitgereik is.
  6. National Archives of South Africa : Data of the Bureau of Heraldry
  7. Kaap die Goeie Hoop Amptelike Koerant 3137 (8 Junie 1962).
  8. Heyns, Tania (23 Maart 2020). "Nóg 'n skool bevestig Covid-19-geval". Maroela Media. Geargiveer vanaf die oorspronklike op 20 April 2020. Besoek op 23 Maart 2020.