Boulevard périphérique de Paris



Boulevard périphérique de Paris

Parys en Île-de-France
Vlag van Frankryk Frankryk


Gebou tussen

1956 en 1973


Lengte

35,04 km


Kaart

Die Boulevard périphérique de Paris (Franse uitspraak: [bulvaʁ peʁifeʁik], dikwels afgekort tot Périphérique, Périph of BP) is 'n kringpad met maksimaal vyf rylane in elke rigting en 'n lengte van 35,04 kilometer wat - met enkele klein uitsonderings - rondom die Franse hoofstad Parys met sy twintig arrondissements loop.

Boulevard périphérique naby Saint-Ouen
Wisselaar by Pointe-Maillot

Die kringpad, wat amptelik nie as snelweg geklassifiseer word nie en waarop 'n spoedbeperking van 70 km/h ingestel is, is tussen 1956 en 1973 gebou en het die ou militêre versterkings rondom Parys vervang wat uit die periode tussen 1840 en 1845 gedateer het. Dit is op 25 April 1973 deur die destydse Franse premier Pierre Messmer amptelik ingewy. Met enkele uitsonderings is alle nedersettings buite die kringpad selfstandige munisipaliteite. Die kringpad, wat grotendeels langs die administratiewe stadsgrens van Parys loop, word dan ook algemeen as die grenslyn tussen die Seine-metropool en sy uitgestrekte voorstede beskou wat grotendeels werkersklashuishoudings huisves.

Die meeste hoofsnelweë in Frankryk lei na die metropolitaanse gebied van Parys en hier juis na die Boulevard périphérique. Verkeer van alle rigtings vloei na die kringpad en maak dit een van die besigste paaie in Europa, met meer as een miljoen voertuie per dag[1], maar plaas ook soveel verkeersdruk op die Boulevard dat verkeersopeenhopings aan die orde van die dag is. Belangrike snelweë (Frans: Autoroute, kort A) uit ander dele van die land, wat na die Boulevard périphérique lei, sluit die A 1 vanaf Lille, die A 4 vanaf Reims en Straatsburg, die A 5 vanaf Troyes, die A 6 vanaf Lyon en Dijon, die A 77 vanaf Nevers, die A 10 vanaf Orléans, die A 13 vanaf Rouen en die A 16 vanaf Amiens in.

Verwysings wysig