Bröhan-Museum

Bröhan-Museum
Charlottenburg-kasteelkompleks, Berlyn

Stigting
1973

Stigter
Karl H. Bröhan (1921–2000)

Webtuiste
Bröhan-Museum Geargiveer 24 Januarie 2014 op Wayback Machine

Die Bröhan-Museum is 'n museum in die stadsdeel Charlottenburg van die Duitse hoofstad Berlyn wat op internasionale beeldende kuns en kunshandwerk uit drie kunstydperke fokus: Jugendstil, Art Déco en Funksionalisme – kunsstrominge wat tussen 1889 en 1939 gefloreer het.

Die museum se konsep behels die vertoning van kunsvoorwerpe in vertoonsale wat aan een spesifieke styltydperk gewy en as elegante woonvertrekke ontwerp is. So word 'n verskeidenheid van werke, wat van Jugendstil-kunstenaars as wegbereiders van Modernisme tot Art Déco en Funksionalisme strek, deur geselekteerde voorbeelde vertoon wat van glas, keramiek, porselein, silwer en metaal gemaak is en in kombinasie met meubels, tapyte, lampe, grafiese kuns en skilderye volgens die betrokke periode se tipiese woonatmosfeer uitgestal.^[1] Die museum se versameling verduidelik die gelykwaardigheid van verskillende kunsuitings.

In die versamelings staan werke van Franse en Belgiese Art Nouveau-kunstenaars sentraal, net soos Duitse en Skandinawiese Jugendstil-kuns en samestellings van Franse Art Déco-kuns. Daarnaas beskik die Bröhan-Museum oor 'n buitengewone versameling van porselein van leidende Europese porseleinmakers, waaronder KPM Berlin, Royal Copenhagen, Meißen, Nymphenburg, Sèvres en Rozenburg, en metaal- en glaskuns wat deur die belangrikste kunstenaars en wegwysende industriële vervaardigers van die betrokke periodes geskep is, waaronder Émile Gallé en Joh. Loetz Wwe., meubels van Eugène Gaillard, Hector Guimard, Louis Majorelle, Peter Behrens, Bruno Paul en Richard Riemerschmid, meubilerings van Jacques-Émile Ruhlmann, Art-Déco-kuns soos die smeewerk van Edgar Brandt, silwerkuns van Jean Puiforcat, Parys, en Georg Jensen, Kopenhagen.

Op die derde verdieping is een kunskabinet elk aan die Belgiese Jugendstil-kunstenaar Henry van de Velde en aan die Wiener Secession-kunstenaar Josef Hoffmann gewy. Daar word ook aandag geskenk aan beduidende ontwerpers van seriële kuns uit die tydperk tussen 1900 en 1939, met werkvoorbeelde van Friedrich Adler, Albinmüller, Christopher Dresser, Jan Eisenloeffel, Hermann Gretsch, Archibald Knox, Joseph Maria Olbrich, Trude Petri en Wilhelm Wagenfeld.

Die museum bevat 'n skilderyversameling wat onder meer op Berliner Secession-kunstenaars fokus, waaronder Hans Baluschek, Karl Hagemeister, Willy Jaeckel, Walter Leistikow en Franz Skarbina. Werke van Jean Lambert-Rucki, wat kubistiese invloede toon, vul die versameling met Franse Art Déco-meubels aan. Ter geleentheid van die museum se 25-jarige jubileum in Desember 1998 is 'n galery met skilderye, pastelwerke en tekeninge op die eerste verdieping ingewy.

Naamgewer

Die Bröhan-Museum is vernoem na sy stigter, Karl H. Bröhan (1921–2000), wat sy privaat kunsversameling ter geleentheid van sy 60ste verjaardag aan die stad Berlyn geskenk het. Die versameling, wat hy self saamgestel het, is vanaf 1973 in 'n villa in die Berlynse voorstad Dahlem vertoon en was toeganklik vir die publiek. Sedert 14 Oktober 1983 word die versameling in 'n laat-klassisistiese voormalige kaserne gehuisves wat deel uitmaak van die Charlottenburgse kasteelkompleks. Sedert 1994 word die museum as Landesmuseum deur die deelstaat Berlyn bestuur.