Brenthurst-biblioteek

Die Brenthurst-biblioteek in 'n privaat versameling van Africana in Parktown, Johannesburg.

Hierdie biblioteek het ontwikkel uit die persoonlike versamelings van sir Ernest Oppenheimer en Harry Oppenheimer. Alhoewel die klem in die versameling op Suider-Afrika lê, word die hele Afrika weerspieël.

Die versameling bestaan uit 'n 20 000 boeke, 2 000 pamflette, ou tydskrifte, landkaarte, kunswerke en skilderye (o.a. van Thomas Baines) en foto's (o.a. unieke foto's van mynboubedrywighede). In die manuskripversameling is briewe en dagboeke van sendelinge, vroeë reisigers, soldate en politici. Uit die versameling kan duidelik gesien word wat die belangstellings van die Oppenheimers was: geskiedenis, politiek, volkekunde, biografie, plant- en dierkunde.

In die biblioteek is ook die uitgewersmaatskappy en boekbindery Brenthurst Press gevestig. Hierdie firma is in 1974 gestig met as doel die publikasie van Africana en as kenmerk hoogstaande redigeer-, druk- en bindwerk.

Die besondere gebou waarin die biblioteek en uitgewer gehuisves word, is op 23 Februarie 1984 geopen. Dit is 'n ontwerp van die argitek Hans Hallen.

Navorsers kan die biblioteek slegs op afspraak besoek.

Bibliografie wysig

  • The Brenthurst Library: a series of treasuries. Lantern, tydskrif vir kennis en kultuur, Julie 1984, jaargang 33, nr. 3.
  • www.brenthurst.org.za

Koördinate: 26°10′17.55″S 28°2′37.70″O / 26.1715417°S 28.0438056°O / -26.1715417; 28.0438056