Brian Astbury

Brian Astbury was ’n fotograaf, regisseur, ontwerper en medestigter van die teater Die Ruimte in Kaapstad.

Hy het kuns en fotografie studeer. In 1972 het hy, sy vrou, Yvonne Bryceland, Athol Fugard en ander gevoel daar is ’n behoefte aan ’n nierassige, eksperimentele teater en so is Die Ruimte in Langstraat, Kaapstad, gebore. Hy was die algemene bestuurder, direkteur, ontwerper en fotograaf. In die sewe jaar van die teater se bestaan was hy die regisseur van The Sun King, A Thousand Clowns, The Tiger, Treats, What the Butler Saw, Children of the Wolf, Dracula, Going to Pot, Old King Cole, Play It Again, Sam en ander toneelstukke.

Hy het ook die ligte en toneeldekor ontwerp vir verskeie produksies. Verder was hy die medeskrywer van ’n paar stukke wat in Die Ruimte opgevoer is, soos Zombie en The Leonardo Was Right – an Investigation of Guilt. Hy was ’n goeie fotograaf wat baie foto's geneem het van opvoerings in die teater, en in 1979 het hy ’n boek oor Die Ruimte geskryf wat geïllustreer is met van dié foto's.

In 1979 het Bryceland en Astbury Die Ruimte toegemaak en na Londen verhuis, waar sy haar loopbaan voortgesit het. Astbury het steeds foto's geneem en toneelklasse gegee. In 2011 het hy ’n boek gepubliseer oor die opleiding van akteurs, Trusting the Actor.