Die Ruimte (Engels: The Space, Xhosa: Indawo) was ’n invloedryke "alternatiewe" teater in Kaapstad wat in 1972 deur Brian Astbury en sy aktrise-vrou, Yvonne Bryceland, geopen is[1] met die hulp van baie mense in die Kaapstadse toneelwêreld soos Athol Fugard. Dit het gou gevestig geraak as ’n uitdagende, nie-rassige teater.

Die Ruimte
Ander name The Space
Indawo
Die Volksruimte
Stad of dorp Kaapstad
Land Suid-Afrika
Geopen 1972
Gesluit 1981

Ruimtes wysig

Dit het die eerste keer in Bloemstraat, Kaapstad, geopen met die toneelstuk Statements after an Arrest under the Immorality Act, met Athol Fugard en Yvonne Bryceland. In 1973 is ’n kunsateljee ook aangebring en in 1974 het ’n tweede deel, The Outer Space, geopen met Pieter-Dirk Uys se Pity about People. Om apartheidswetgewing te omseil, is Die Ruimte bedryf as ’n teaterklub, die Space Theatre Club, om voorsiening te maak vir veelrassige gehore en akteurs. Sommige produksies is aangebied "slegs vir lede".[2]

In 1976 het dit geskuif na Langstraat met ’n opvoering van Tsafendas deur William (Bill) Tanner. Benewens die hoofteater is ander, kleiner areas in die ou en nuwe geboue ook van tyd tot tyd gebruik, soos The Gym, The Rehearsal Room en Upstairs at the Space.

Dit het die tuiste geword van baie van Suid-Afrika se bekende akteurs soos Yvonne Bryceland, Athol Fugard, Pieter Dirk Uys, David Kramer, Barney Simon, John Kani, Bill Flynn, Richard E. Grant, Paul Slabolepszy, Marius Weyers, Marthinus Basson, Fiona Ramsay, Percy Sieff, Ian Roberts, Trix Pienaar, Grethe Fox, Bill Curry en talle ander jong akteurs, regisseurs en skrywers.

Dit was ook die inspirasie vir ander soortgelyke teaters soos die Markteater in Johannesburg en die Baxter in Kaapstad.

Die einde wysig

In September 1979 het Die Ruimte sy deure gesluit toe Astbury en Bryceland na Engeland verhuis het. Dit het toe heropen as Die Volksruimte (The People's Space) onder Rob Amato, Muriel Fine en ander, en in 1981 het sy deure amptelik gesluit.

In 1997 het Kaapstad die 25ste jaar van die opening van Die Ruimte gevier met Pieter-Dirk Uys se nostalgiese terugblik, No Space on Long Street. Dit is in die Baxter opgevoer.

Verwysings wysig

Eksterne skakels wysig