Grethe Fox
Grethe Fox (gebore 195?, Zimbabwe) is ’n Suid-Afrikaanse aktrise, regisseur en vervaardiger van toneelstukke, rolprente en TV. Sy is die dogter van die bekende Kaapstadse argitek Revel Fox, die broer van die skrywer en fotojoernalis Justin Fox en die susterskind van die skrywer en digter Uys Krige.
| Grethe Fox | |
| Geboorte | 195? Zimbabwe |
|---|---|
| Nasionaliteit | Suid-Afrikaans |
| Ouers | Revel Fox, Suzanne Krige |
| Lewensmaat | Manie van Rensburg David Krut |
| Alma mater | Universiteit van Kaapstad |
| Beroep(e) | Aktrise |
| Internet-rolprentdatabasis-profiel | |
In ’n onderhoud met die tydskrif Rooi Rose in 1999 het Fox gesê sy kon op driejarige ouderdom reeds Sweeds praat, haar ouma het haar Afrikaans leer praat en haar ouers het net Engels met haar gepraat; dit verduidelik haar gemak met tale.[1]
Lewe en loopbaan wysig
Fox het aan die Universiteit van Kaapstad drama studeer en die Jacques Lecoq-teater-en-mimiekskool in Parys bygewoon.
Sy was onder meer by Kruik, Truk, die Markteater en Die Ruimte betrokke. In laasgenoemde teater het sy (vir ’n ruk as Grethe-Maria Fox) opgetree in Dance Is, Fallen Angels, Karnaval (Pieter-Dirk Uys, 1975), Occupations, Revenge, Theatre of Silence, Slag en Wooed and Viewed.[1]
Van die meer as 100 toneelstukke waarin sy te sien was, is Die Stoele (1970), Arme Moordenaar (1974), Vroue van Troje (in die Markteater, 1976), Uncle Vanya, Drie Susters Twee, Die Fisici, Trippe Trappe Tone, Die Wind in die Takke van Sassafras en Black Comedy. Sy was ook te sien in Sweeney Todd, Arme Marat, Die Belofte van Aleksei Arboesof saam met Regardt van den Bergh en Eckard Rabe en Die Goue Seun (KKNK, 2002).
Op TV het sy die rol van Harriet in Isidingo vertolk en van 1999 tot 2003 die rol van Karen van Niekerk in Soul City. Ander TV-werk sluit in Torings, Konings, Onder draai die duiwel rond, Dokter, Dokter en Die Mannheim-sage.[2]
Fox het ook ’n groot reeks musiekvideo's en dokumentêre oor ’n wye reeks onderwerpe vervaardig.
Sy woon in Johannesburg saam met haar lewensmaat, die uitgewer David Krut. Sy was eens getroud met die rolprentvervaardiger Manie van Rensburg.
In 1994 het sy Fox Films saam met haar broers, Revel en Justin, gestig.[1]
Pryse en benoemings wysig
Van Fox se prestasies sluit in:
- 1991: Benoem vir ’n nasionale Vita vir The Fourth Reich en A Doll's House
- 1993: Wenner van ’n Vita (Natalstreek) vir beste byspeelster vir haar rol as Liz Fourie in Women in the Wings (Deon Opperman)
- 1998: Wenner van ’n Avantiprys vir haar rol as Dolores de la Rey in Onder draai die duiwel rond (Katinka Heyns).