Bryce Thompson

Bryce Thompson (Kaapstad, 13 April 1983) is ’n Suid-Afrikaanse model wat reeds meer as 30 keer op die voorblad van verskeie internasionale uitgawes van die tydskrif Men’s Health verskyn het. Teen 2015 was hy die man wat die meeste kere op die tydskrif se voorblad gepryk het. Hy is 1,91 m lank, sy borsmaat is 102 cm, sy heupmaat 81 cm en sy skoengrootte 11. Hy het bruin hare en groen oë.

Thompson (regs) en sy sibbes, Levi Lomey en Maxime Alix.

Bryce Thompson en sy meisie, die Duitse model Alena Blohm.

Bryce Thompson, sy meisie, Alena Blohm, en ma, Sharleen Gracie.

Herkoms

Thompson het in Kaapstad grootgeword waar hy sy skoolloopbaan aan die Laerskool Milnerton begin het. Hy het eers die Hoërskool Milnerton bygewoon en daarna aan Abbott’s College gematrikuleer. Hoewel hy goed geslaag het, beskryf hy sy punte as “onder my potensiaal”. Op skool was wetenskap sy beste en Afrikaans sy swakste vak. Hy het aanvanklik as uitgewer gewerk waar hy in die publikasie van tydskrifte en die vervaardiging van fotosessies gewerk het, voor hy model geword het. Sy heel eerste modelwerk was vir ’n voorblad van Men’s Health. Met die karige vergoeding daarvoor het hy ’n hamburger gekoop. Sy hoofagentskap is Kult Model Agency in Hamburg, van wie 'n tak hom ook in Kaapstad verteenwoordig. In New York is hy by Soul Artist Management en in Los Angeles by Next LA.

Modelloopbaan

Thompson was in 2012 op die voorblad van die Suid-Afrikaans uitgawe van Men’s Health. In 2013 het hy in Polo Ralph Lauren se lentereklameveldtog verskyn en in ’n artikel in die Maart-uitgawe van Men’s Health getiteld “Destination Romance”, waarvoor Justin Polkey die foto’s geneem het. In Desember daardie jaar was hy weer op Men’s Health se voorblad. Middel 2014 was hy in ’n artikel vir die Julie-uitgawe van W Magazine, getiteld “Who’s the Boss?” Die fotograaf was Steven Klein. Vir die Augustus-uitgawe van Dujour se artikel “The Next Jenner-ation” het Bruce Weber hom afgeneem. In November daardie jaar het hy in ’n artikel, "Les Memoires Inedits de Madame la Comtesse de Genevieve", in die tydskrif TVTOR verskyn.

In 2015 het hy verskyn in ’n artikel vir die Februarie-uitgawe van Vogue China, getiteld “Global Shopping”. Chris Craymer het die foto’s geneem. Vir die Maart-uitgawe van W Magazine het Steve Klein hom afgeneem vir die artikel “Love Machine”. In daardie jaar het hy Michael Bastian se lentereeks op die loopplank vertoon.

Belangstellings

Sy mees suksesvolle sportsoort is verfbal, waarin hy Suid-Afrika in die wêreldbekertoernooi van 2007 in Florida verteenwoordig het. Hy beskryf branderplankry as sy swakste sport. Omdat hy in New York woon, is sy gunsteling-vakansiebestemming die Moederstad waar sy ouers woon, maar hy span ook graag uit op Zanzibar. Hy gaan uit met die Duitse model Alena Blohm. Hy het sy halfbroer, Levi Lomey, gehelp om hom in die modelbedryf te vestig en selfs terwyl Lomey nog op skool was toestemming by die skoolhoof gekry dat Lomey sy Junie-eksamen drie week vroeër kon skryf sodat hy vir Dior kon modelleer tydens die Paryse Modeweek 2009.

Bronne

• (en) christopheruveniodesign^{[dooie skakel]}. URL besoek op 18 Desember 2017.

Eksterne skakels

• (en) 'n Fotosessie met die fotograaf Greg Vaughan. URL besoek op 18 Desember 2017.