Kallie Kriel

Carl Martin Kriel (gebore 14 September 1969 in Johannesburg) is die hoof uitvoerende beampte van die Suid-Afrikaanse burgerregte-organisasie AfriForum. Kriel is getroud met Ella Johanna (Née Potgieter), ’n opvoedkundige sielkundige en hulle het vyf kinders.

Kallie Kriel
Kallie Kriel spreek Tukkiestudente toe tydens die #AfrikaansMustFall optogte. AfriForumstudente het sterk standpunt ingeneem teen die afskaffing van Afrikaans-onderrig op Tukkies en ander kampusse.
Gebore	14 September 1969 Johannesburg
Nasionaliteit	Suid-Afrikaner
Alma mater	Universiteit van Pretoria
Eggenoot	Ella Johanna

Kallie Kriel tydens 'n protesaksie voor die Pretoriase hooggeregshof teen die beskadiging van die Standertonse Groot Trek-gedenkplaat.

Onderwys

Kriel het in Pretoria grootgeword waar hy aan die Hoërskool Pretoria-Noord gematrikuleer het. Hy het sy B.A.-graad in 1990 aan die Universiteit van Pretoria (UP) verwerf sowel as ’n hoëronderwysdiploma in 1991 en sy honneursgraad in 1992. In 1996 het hy sy meestersgraad in politieke geografie aan UP behaal.

In 1991/92 het Kriel op die studenteraad van Tukkies gedien.

Loopbaan

Hy het na die voltooiing van sy studies drie jaar by die Hoërskool Centurion skoolgehou. Daarna het hy by die vakbond Solidariteit aangesluit en was die hoof van bemarking en -ledevoordele net voor die stigting van AfriForum. Kriel is sedert 1999 in diens van die Solidariteit-beweging. In 2006 het hy die leiding in die stigting van die burgerregte-inisiatief AfriForum geneem.

Werk by AfriForum

AfriForum staan aan die spits van ’n wye verskeidenheid veldtogte ter beskerming van burgerregte. Van die grootste aksies waarby Kriel die afgelope paar jaar betrokke was, is die stryd vir die behoud van Pretoria se naam, die Julius Malema-hofsaak teen haatspraak en plaaslike en internasionale veldtogte teen ongeldige sportkwotas.

Onder die leiding van Kriel het AfriForum Suid-Afrika se eerste privaatvervolgingseenheid op die been gebring. Kriel het in Januarie 2017 aangekondig dat advokaat Gerrie Nel as die hoof van dié eenheid aangestel is. Die eenheid het reeds verskeie sake aangekondig.

Kriel is ook by ’n reeks veldtogte teen onteiening sonder vergoeding, die beskerming van eiendomsreg en die bewusmaking van plaasmoorde in Suid-Afrika betrokke. Kriel en Ernst Roets, een van AfriForum se adjunk- uitvoerende hoofde, het in Mei 2018 ’n toer na die Verenigde State onderneem om die internasionale gemeenskap te mobiliseer teen die ANC se amptelike beleid van onteiening sonder vergoeding, wat gedurende Desember 2017 deur dié party aanvaar is, asook vir bewusmaking oor plaasmoorde.

In Oktober 2018 het AfriForum ’n samewerkingsooreenkoms teen onteiening sonder vergoeding met die Zoeloe-koning Goodwill Zwelithini  gesluit. Kriel het ook in 2018 ’n samewerkingsooreenkoms tussen AfriForum en die leier van die politieke party COPE, Mosiuoa Lekota, teen onteiening sonder vergoeding aangekondig. Oor dié samewerkingsooreenkomste het Kriel gesê: “Almal in die land gaan negatief geraak word wanneer die ANC se miskenning van eiendomsreg die land se ekonomie verder benadeel. Juis daarom moet groepe oor ’n wye front nou teen onteiening sonder vergoeding saamwerk. AfriForum se samewerking met COPE om eiendomsreg te beskerm, is 'n goeie begin. Mense vanuit verskillende agtergronde, en wat somtyds verskillende standpunte het, kan wel suksesvol saamwerk deur te fokus op sake van gedeelde belang. Die beskerming van eiendomsreg is 'n saak van gedeelde belang.”

Kriel het AfriForum sedert 2006 opgebou tot een van die invloedrykste burgerregteorganisasies in Suid-Afrika. AfriForum het 'n aktiewe ledetal van meer as 170 000 in 2016 gehad, en meer as 216 000 lede aan die einde van 2018.