Café Riche, Pretoria

Café Riche is op die hoek van Parlement- en WF Nkomostraat, langs Kerkplein in Pretoria geleë. Die gebou is in 1904 deur die Nederlandse argitek Frans Soff ontwerp en in 1905 gebou. Soff het ook die Vrouemonument in Bloemfontein saam met Anton van Wouw ontwerp.

Café Riche

Die gebou het oorspronklik bekend gestaan as die Investmentgebou, maar as gevolg van Café Riche se gewildheid het die gebou se vorige naam vergete geraak. Café Riche is een van die oudste restaurante in Pretoria.

Die gebou is ontwerp in die Art Nouveau-styl wat tussen 1894 en 1914 in Europa gewild was. Die klip-uil op die betonvoetstuk, asook die kunswerk van 'Mercurius', is albei deur Anton van Wouw ontwerp.

Die vensterrame en deure het van die Toringkerk, die tweede en laaste kerk in Kerkplein wat 'n toring gehad het, gekom.

Café Riche is as 'n Provinsiale Erfenisterrein verklaar en word ingevolge Artikel 34 van die Wet op Nasionale Erfenishulpbronne (Wet 25 van 1999) beskerm, aangesien dit ouer as 60 jaar is.[1]

Waterprobleem wysig

In September 2015 was daar sprake van die moontlike sluiting van Café Riche wat verband gehou het met die gebou se kelderkantore wat al meer as vyf jaar lank onder water was, omdat storm- en rioolwater as gevolg van stukkende pype daar ingespoel en opdam het. Die gebou, wat aan die Gautengse Departement van Infrastruktuurontwikkeling behoort, se fondamente het skade gely. Nuwe pompe is onder in die gebou geïnstalleer om die water uit te pomp, maar dit is ondertussen gesteel.[2]

Fotogalery wysig

Bronne wysig

Verwysings wysig

  1. "SAHRA:Café Riche, Church Square Pretoria, besoek op 11 Januarie 2015". Geargiveer vanaf die oorspronklike op 11 Oktober 2015. Besoek op 11 Januarie 2015.
  2. "Netwerk24 – Gewilde kuierplek op Kerkplein moet dalk sluit weens water in kelder". Geargiveer vanaf die oorspronklike op 5 Oktober 2015. Besoek op 10 Oktober 2015.