Charles De Coster

Charles Théodore Henri De Coster (* 20 Augustus 1827 in München; † 7 Mei 1879 in Ixelles) was 'n Franstalige Belgiese skrywer van Vlaamse afkoms. Sy epiese werk Ulenspiegel, wat die Vlaamse vryheidstryd teen die Spaanse onderdrukking gedurende die Tagtigjarige Oorlog behandel, word as die beginpunt van die moderne Franstalige literatuur in België beskou.

Charles De Coster
Gebore	Charles-Theodore-Henri De Coster 20 Augustus 1827 München, Beiere
Sterf	7 Mei 1879 (op 51) Ixelles, België
Nasionaliteit	België
Beroep	skrywer, joernalis

Biografie

De Coster-monument in Ixelles naby Brussel

De Coster is as die seun van 'n 'n Vlaamse vader en amptenaar van die pouslike Nuntius, en 'n Waalse moeder in München gebore. Hy het regte en letterkunde in Brussel gestudeer en hier later ook self as letterkunde-dosent gewerk. Hy was daarnaas ook tydelik in diens van 'n bank en die Belgiese Staatsargief. Vir 'n kort periode het hy ook as dosent aan die Koninklike Militêre Skool van België gewerk.

Vanaf 1855 het De Coster hom as joernalis en vryskutskrywer bekwaam. Sy eerste gedigte het in die tydskrif Revue trimestrielle, wat in 1854 gestig is, verskyn. In die tydskrif Uylenspiegel, wat vanaf 1856 verskyn het, het hy sy debuut as prosaskrywer gemaak. De Coster het veral die werke van François Rabelais en Michel de Montaigne bestudeer en sodoende 'n uitgebreide kennis van 16de eeuse Frans verwerf. Volgens sy standpunt kon die Vlaamse tradisies en taal in moderne Frans hoegenaamd nie uitgedruk word nie sodat hy van sy beste werke in die ou taalvorm geskryf het. Sy Vlaamse volksverhale (Légendes flamandes, 1857) het groot sukses behaal, onder meer danksy die illustrasies wat Félicien Rops en ander vriende bygedra het. Sy Brabantse verhale (Contes brabançons) is in 1861 in moderne Frans gepubliseer.

Nadat hy sy werk by die Staatsargief bedank het, het hy oor die tydperk van bykans tien jaar daarin geslaag om met sy romanties-patriotiese roman La légende et les aventures héroïques, joyeuses et glorieuses d'Ulenspiegel et de Lamme Goedzak au pays des Flandres, wat in 1867 verskyn het en in sy tweede uitgawe deur Rops en ander van illustrasies voorsien is, die Tagtigjarig Oorlog, wat tot dusver hoofsaaklik deur die groot Vlaamse skilders uitgebeeld is, ook in 'n literêre werk te behandel wat later aan beduidende werke van die wêreldliteratuur soos Don Quixote gelyk gestel sou word. Nogtans was die eerste uitgawe van Ulenspiegel in ekonomiese opsig geen sukses nie. Eers ná De Coster se afsterwe is die werk in 1893 herdruk om vervolgens baie gewild te raak.

Die sukses het vir De Coster te laat gekom; tydens sy skryfwerk vir Ulenspiegel het hy verskuld geraak en in armoede gesterf.

Werke

• Contes brabançons (1861)
• La légende et les aventures héroiques joyeuses et glorieuses d'Ulenspiegel et de Lamme Goedzak au pays des Flandres et ailleurs (1867)
• Légendes flamandes (1858)

Literatuur

• A. Gerlo: Coster en Vlaanderen. Antwerpen 1959
• Joseph Hanse: Charles de Coster. Bruxelles, Palais des Académie, 1990
• Leon L. Sosset: La vie pittoresque et malheureuse de Charles de Coster. Verviers 1938

Eksterne skakels

• Gedigitaliseerde Franse uitgawe van Ulenspiegel
• The glorious adventures of Tyl Ulenspiegl (Die gedigitaliseerde eerste uitgawe van die Engelse vertaling)