Charles Messier
Charles Messier (26 Junie 1730 – 12 April 1817) was ’n Franse sterrekundige wat veral bekend is vir sy astronomiese katalogus van voorwerpe soos newels en sterreswerms wat bekend is as die 110 "Messier-voorwerpe". Die doel van die katalogus was om ruimtewaarnemers, veral komeetjagters soos hyself, te help onderskei tussen komete en voorwerpe wat soos komete lyk, maar dit nie is nie.
Charles Messier | |
|---|---|
 | |
| Gebore | 26 Junie 1730 Badonviller, Lotharinge, Frankryk |
| Sterf | 12 April 1817 |
| Nasionaliteit | Frankryk |
| Beroep | Sterrekundige |
| Bekend vir | Messier se katalogus |
Biografie
wysig
Messier is in Badonviller in die streek Lotharinge in Frankryk gebore as die tiende van twaalf kinders. Sy belangstelling in die sterrekunde is gewek deur die verskyning van die skouspelagtige C/1743 X1-komeet met ses sterte in 1744, asook deur ’n sonsverduistering op 25 Julie 1748 wat van sy tuisdorp sigbaar was.
In 1751 het hy gaan werk by die sterrekundige Joseph Nicolas Delisle, wat hom opdrag gegee het om streng aantekeninge van sy waarnemings te maak. In 1764 het hy ’n fellow van die Britse Royal Society geword, in 1769 is hy gekies as ’n buitelandse lid van die Sweedse Wetenskapakademie en op 30 Junie 1770 is hy verkies tot die Franse Wetenskapakademie.
Messier het 13 komete ontdek:[1]
- C/1760 B1 (Messier)
- C/1763 S1 (Messier)
- C/1764 A1 (Messier)
- C/1766 E1 (Messier)
- C/1769 P1 (Messier)
- D/1770 L1 (Lexell)
- C/1771 G1 (Messier)
- C/1773 T1 (Messier)
- C/1780 U2 (Messier)
- C/1788 W1 (Messier)
- C/1793 S2 (Messier)
- C/1798 G1 (Messier)
- C/1785 A1 (Messier-Méchain)
Sy katalogus
wysig
Die eerste uitgawe van Messier se katalogus het 45 voorwerpe gelys en is in 1774 gepubliseer in die tydskrif van die Franse Wetenskapakademie in Parys. Die laaste weergawe het in 1781 verskyn, in Connoissance des Temps.[2] Die lys het eindelik tot 103 voorwerpe gegroei.
Op verskeie geleenthede tussen 1921 en 1966 het sterrekundiges en historici bewyse ontdek van ander voorwerpe wat óf Messier óf sy vriend en assistent Pierre Méchain waargeneem het kort ná die verskyning van die laaste uitgawe. Hierdie sewe voorwerpe, van M104 tot M110, word deur sterrekundiges aanvaar as "amptelike" Messier-voorwerpe.
Die Messier-name word steeds gebruik vir dié voorwerpe. Omdat hulle met behulp van ’n relatief klein teleskoop gesien kan word, bevat die katalogus van die helderste en dus mooiste ruimtevoorwerpe in die noordelike hemelruim wat van die Aarde af gesien kan word en is hulle van die gewildste voorwerpe onder amateur-ruimtewaarnemers om te besigtig en te fotografeer.
Die krater Messier op die maan en die asteroïde 7359 Messier is na hom genoem.[3]
Verwysings
wysig- ↑ "Maik Meyer. Katalogus van Komeetontdekkings". Geargiveer vanaf die oorspronklike op 16 Julie 2008. Besoek op 16 Julie 2008.
- ↑ Charles Messier, 1781. Catalogue des Nébuleuses & des amas d'Étoiles. Connoissance des Temps for 1784 (1781), pp. 227–267 [Bibcode: 1781CdT..1784..227M].
"Oorspronklike Messier-katalogus van 1781". Oorspronklike Messier-katalogus van 1781. Geargiveer vanaf die oorspronklike op 29 Junie 2012. Besoek op 10 November 2007. - ↑ Schmadel, Lutz D.; International Astronomical Union (2003). Dictionary of minor planet names. Berlin; New York: Springer-Verlag. pp. 592–593. ISBN 978-3-540-00238-3. Besoek op 9 September 2011.
- O'Meara, Stephen James (1998). Deep Sky Companions: The Messier Objects. Cambridge University Press.
- Charles Messier Geargiveer 19 Julie 2004 op Wayback Machine Biografie by Students for the Exploration and Development of Space. URL besoek in Julie 2007
- Kort biografie en geskiedenis Geargiveer 13 Februarie 2007 op Wayback Machine deur Jon Zander by OurDarkSkies.com. URL besoek in Julie 2007
- Life of a Comet Hunter: Messier and Astrobiology Geargiveer 8 Februarie 2012 op Wayback Machine Prof. Mark Brake en Martin Griffiths, Astrobiology Magazine European Edition, Lente 2007. URL besoek in Julie 2007
Eksterne skakels
wysig- Amateurfoto's van Messier-voorwerpe Geargiveer 28 Julie 2012 op Wayback Machine
- Biografie, Messier-webtuiste
- Messier-marathons Geargiveer 2 September 2011 op Wayback Machine
- Tabel van Messier-voorwerpe Geargiveer 20 Oktober 2014 op Wayback Machine
Hierdie artikel is vertaal uit die Engelse Wikipedia
