Chester W. Nimitz

Chester William Nimitz, Sr. (24 Februarie 1885 - 20 Februarie 1966) was 'n vlootadmiraal in die Amerikaanse Vloot. Hy het 'n groot rol gespeel in die seekrygsaksies van die Tweede Wêreldoorlog as opperbevelhebber van die Amerikaanse Stille Oseaan-vloot en die Stille Oseaan-gebiede en was ook in beheer van die Geallieerdes se lug-, land- en seemagte.

Nimitz was die toonaangewende kenner van duikbootoorlogvoering in die Amerikaanse Vloot. In sy jong dae kwalifiseer hy as 'n duikbootoffisier, en hou later toesig oor die omskakeling van die vaartuie se aandrywing van petrol na dieselenjins. Hy het ook later 'n sleutelrol gespeel in die verkryging van goedkeuring vir die wêreld se eerste kernaangedrewe duikboot, USS Nautilus. Kernaandrywing vir duikbote het daarna die norm geraak in die Amerikaanse Vloot.

Hy was ook, vanaf 1917, die breinkrag agter die ontwikkeling van die vloot se "herbevoorading ter see", die instrument wat die Amerikaanse vloot feitlik onbepaald in bedryf ter see sou kon hou tydens operasies of oorloë. Nimitz was die hoof van die Vlootburo vir Navigasie in 1939 en van 1945 tot 1947 hoof van vlootoperasies.

Ten tye van sy dood was hy die laaste oorlewende offisier van die Verenigde State wat in die rang van vlootadmiraal gedien het.

Eksterne skakels

• Wikimedia Commons het meer media in die kategorie Chester W. Nimitz.