Christoff Blaauw

Christoff Blaauw was teen die einde van sy formele beroepslewe markintelligensiebestuurder by die SAUK en die skrywer van kontreikuns en radiodramas. Hy is tans vryskut skrywer en skilder van Namibiese landskappe. Die kokerboom en die Namibwoestyn is sentrale temas op sy skilderwerk.

Lewe en werk

Christoffel Edward Blaauw is op 8 Desember 1950 in Keetmanshoop, in die destydse Suidwes-Afrika, nou Namibië, gebore. Sy ouers het op die plase Berghof en Erasmusputz in die Groot Karasberge geboer, waar hy as plaasseun grootgeword het. Die plaaslewe het later ń groot invloed op sy latere skryfwerk gehad en was aanleidend tot ń bundel kortverhale, Karasberg-nostalgie, wat in 2014 die lig gesien het.

Hy matrikuleer aan die Hoërskool PK de Villiers in Keetmanshoop in 1968 en studeer daarna aan die Potchefstroomse Universiteit vir Christelike Hoër Onderwys, waar hy die grade BA Kommunikasiekunde (1972), ń Magistersgraad (1979) en ook ’n Ph.D.-graad in Kommunikasiewetenskap (1982) behaal. Laasgenoemde studie het die klem laat val op radio- en oorredingskommunikasie. 

Hy begin werk as joernalis op Potchefstroom in 1972, maar verhuis na Windhoek in 1973 om ń pos by die destydse SWAA te aanvaar. In 1976 begin hy by die SAUK se Radio Damara/Nama diens werk, waar hy onder andere ook radiodramas skryf.

In 1979 aanvaar hy 'n pos as Senior Navorser by die RGN in Pretoria en skuif in 1981 na die Technikon Pretoria as Senior Lektor in Kommunikasiekunde en Skakelwese doseer.

Vanaf November 1983 tot April 1988 is hy sekretaris van die Komitee vir Navorsingprioriteite van Namibië in Windhoek, wat die wetenskaplike navorsingfunksie van die Suidwes-Afrika Administrasie behartig in samewerking met die Wetenskaplike en Nywerheidnavorsingsraad (WNNR) en die Raad vir Geesteswetenskaplike Navosing (RGN) van Suid-Afrika. Hierna sluit hy by die Suidwes-Afrika Uitsaaikorporasie aan as hoofnavorser na luisteraarsbehoefte en gedrag, ’n posisie wat hy tot Februarie 1990 beklee.

Hy keer terug na Suid-Afrika en is vanaf Maart 1990 in diens van die Suid-Afrikaanse Uitsaaikorporasie (SAUK) as Markintelligensie bestuurder vir TV nuus en aktualiteitsprogramme. In hierdie posisie verskaf hy holistiese en strategiese navorsingsinsette aan bestuur oor kykers se behoeftes, voorkeure en gedrag. Hy beklee die posisie tot met einde Desember 2014 waarna hy hom as vryskutskrywer en skilder in Kaapstad gaan vestig.

Die Blaauwgesin se lewe is destyds in 1983-1984 drasties beïnvloed deur die terminale siekte waarmee hul jongste dogter as baba gediagnoseer is. Na ń periode van erge lyding en chemoterapie behandeling ondergaan hul dogter egter ń wondergenesing. Dit gee aanleiding tot die skryf en publikasie van die dokumentêre werk 'Hush-a-bye Baby on a Chemodrip - The True Story of Sandra-Marí Blaauw'.

Skryfwerk

In sy werksperiode by die SAUK in Windhoek skryf Christoff aanvanklik radiodramas in die Nama-idioom wat in Nama vertaal en uitgesaai word. Hy volg dit op met ń vervolgverhaal 'Die Kitaarspeler Ry ń Vaal Perd' wat deur Johannes Isaack in Nama vertaal word. Die verhaal is besonder gewild en word tussen 1977 en 1988 vyf keer uitgesaai. Nog heruitsendings volg in latere jare.

Sy radiodrama 'Nagrit na Keetmanshoop' word op 5 November 2015 deur Radio Sonder Grense (RSG) uitgesaai, nadat dit die kortlys haal in die landswye Sanlam skryfkompetisie. Dit is gebaseer op ’n ware gebeurtenis wat hom een koue nag op 14 Junie 1982 in Namibië afspeel. ’n Dienspligtige wat tydens die grensoorlog diens doen op Grootfontein, korporaal Basjan Engelbrecht, kry ’n rygeleentheid agter op oom Bert en tant San se bakkie na Keetmanshoop. Hulle laai nog ’n ryloper op, ene Lone Ranger van Tsumeb, maar tant San sien ook nog ’n ou man met ’n toiingjas, al sien niemand anders hom nie.  Lone Ranger (regte naam Shaun) se ma verlaat hom en sy pa toe hy nog klein was, waarna sy pa begin drink en hy die bynaam kry, maar die ou man Manny ontferm hom oor Shaun en pas hom op. Wanneer hulle stop sien tant San weer die ou man en ook later agter op die bakkie saam met Basjan en Lone Ranger. Lone Ranger is ernstig siek en beweer hy sien vir Manny, sy bewaarengel. Op Keetmanshoop stop hulle, maar Lone Ranger is intussen dood terwyl Basjan geslaap het. Dit word algaande duidelik dat Manny (afgelei van Emmanuel) regtig is, selfs al kan niemand hom sien of verklaar nie.

“Karasberg-nostalgie” is streeksverhale oor die legendes van die Karasberg in die suidoostelike deel van Namibië. Die kortverhale word afgewissel met gedigte wat fokus op die Karasbergstreek asook gebeure wat met Christoff se gesin en lewe verband hou. ń Beperkte aantal harde kopieë van die boek is gedruk en versprei, terwyl dit ook in e.mobi formaat op Amazon.com beskibaar is.

In Februarie 2017 publiseer Christoff met die hulp van sy vrou Marianne ń dokumentêre verhaal 'Hush-a-bye Baby on a Chemodrip - The True Story of Sandra-Marí Blaauw', wat die aangrypende verhaal van hul terminaal siek dogter vertel. Die kind wat met die uiters rare siekte 'Letterer-Siwe' gebore is en volgens kankerspesialiste ń nul-prognose het, word na maande se chemoterapie-behandeling huis toe gestuur om te sterf. Die Blaauwgesin fokus egter hul hoop op ń goddelike genesing in Jesus Christus. Met Sandra-Marí se lewe wat op ongeveer nog ń week geskat is, kruis hul paaie met ń leke-prediker wat een laat nag ń eenvoudige opregte gebed bid, wat tot ń wonderwerk lei. Sandra ondervind volkome genesing, ervaar ń normale kinder- en studente lewe en besit vandag as volwassene haar eie besigheid saam met eggenoot Pierre. Die boek is ook in beperkte oplaag gedruk en versprei en is in e.mobi- formaat gratis op Smashwords beskikbaar.

Publikasies

Jaar	Publikasies
2015	Karasberg-nostalgie