City of Lincoln (skip)
Die SS City of Lincoln was 'n Britse vragskip van 8039 ton wat in die vroeë oggendure van 9 November 1946 by Quoin Point in die Overberg gestrand het. Aan boord was 'n vrag splinternuwe motors. Dit het gelei tot een van die grootste bergingspogings ooit in Suid-Afrika.
Die skip is in 1938 gebou en het in die Tweede Wêreldoorlog verskeie reise na Malta onderneem. Aan die einde van 1946 was dit onderweg na Suid-Afrika met 13 nuwe motorvoertuie vir die besoek van koning George VI in 1947 aan die land. Toe die skip in die moeilikheid beland, beveel die kaptein dat verskeie van die motors oorboord gegooi word om die skip ligter te maak. Dit was tevergeefs.
Die Nederlandse bergingspesialis, kapt. Dirk van Delden, en sy assistent sterf beide tydens 'n ontploffing. Boonop strand altwee die sleepbote wat gestuur is om die vrag te red en die skip te probeer vlot maak. Uiteindelik is die skip op 10 Maart 1947 na Kaapstad gesleep. Daar is dit afgetakel en die res van die wrak is in Mei 1950 by Robbeneiland deur die lugmag gekelder.
Bibliografie wysig
- www.geocaching.com
- www.upclosetours.co.za