Curro
Curro is 'n Suid-Afrikaanse maatskappy wat 59 privaat kampusse en 138 skole in Suid-Afrika en Namibië besit, met meer as 52 000 leerders.[1] Die Suid-Afrikaanse skole is versprei oor al nege se land provinsies. Van die leerders is 85% Engelssprekend en tweederdes bruin, Indiër of swart. Enkele van die maatskappy se skole gebruik ook Afrikaans as onderrigmedium, onder meer dié op Langebaan en Mosselbaai.
Die maatskappy streef daarna om teen 2020 altesaam 73 kampuse en 169 skole met 80 000 leerders te besit. Om dié doel te bereik, word nuwe skole opgerig of bestaande privaat skole uitgekoop. Die eerste buitelandse Curro-skool, die Engelstalige Windhoek Gimnasium, is in 2015 aangekoop nadat dié onafhanklike skool se leerders sedert sy stigting in 2007 van 280 tot 1 520 toegeneem het. 'n Nuwe skool, Baobab Primary in Botswana was in 2017 gekoop.[1]
Curro is op die Johannesburgse Effektebeurs genoteer en besit ook die Embury-onderwyskollege waaraan in 2015 800 studente studeer het sodat die kollege jaarliks 200 afgestudeerdes kon lewer. Dié getal sal mettertyd verhoog word wanneer afstandsonderrig bygevoeg word. Curro se sogenaamde Meridien-skole, wat goedkoper skoolgeld hef (byvoorbeeld sowat R19 500 aan die Pinehurst-skool in Kaapstad), behaal 'n slaagsyfer van 90%, van wie 43% matriekvrystelling kry. In die duurder skole is die slaagsyfer 99% met 'n gemiddelde punt in wiskunde van 65%.
Verwysings
wysig- ↑ 1,0 1,1 (en) "Annual Results Presentation 2017 YE" (PDF). Curro.co.za. 20 Februarie 2018. Besoek op 29 Maart 2019.
Bronne
wysig- (af) Curro koop Windhoek Gimnasium Geargiveer 6 Desember 2015 op Wayback Machine, Republikein, 30 Junie 2015. URL besoek op 8 Mei 2016.
- (en) Die skool se webtuiste. URL besoek op 8 Mei 2016.