Daar doer in die bosveld
Daar doer in die bosveld is 'n Afrikaanse rolprent wat in 1951 vervaardig is. Dit was Jamie Uys se debuutrolprent asook Suid-Afrika se eerste vollengte-rolprent in kleur (ofskoon dit in 16 mm opgeneem is, in teenstelling met die 35 mm-standaard vir kommersiële speelfilms). Uys het die fliek saam met sy broer Jok en sy vrou Hettie gemaak en ook self daarin gespeel. 'n Eenvoudige Kodak-kamera is gebruik en die vervaardigingskoste het R6 000 beloop. Dit het Uys as 'n akteur, vervaardiger en regisseur gevestig.[1]
| Daar doer in die bosveld | |
|---|---|
| Regisseur | Jamie Uys |
| Draaiboek | Draaiboek: Jamie Uys |
| Met | Jamie Uys Hettie Uys Jurg du Preez Boks Joubert |
| Musiek deur | Anton de Waal |
| Kinematografie | Jamie Uys |
| Redigeerder | Jamie Uys |
| Ateljee | Swan Films |
| Uitgereik | 8 November 1951 |
| Speeltyd | 61 min |
| Land | Suid-Afrika |
| Taal | Afrikaans |
| Begroting | R6 000 |
| Opgevolg deur | Die Bosvelder |
| IMDb-profiel | |
Genre
wysigDie rolprent is 'n lekkerlag-komedie oor 'n boer wat meer van beeste as van vroue weet.
Hoofrolspelers
wysig- Jamie Uys as Hans Botha, die boer.
- Hettie Uys as Martie du Toit, die onderwyseres.
- Jurg du Preez as Koos
- Buks Joubert as Gert Petoors
- Thomas Moema as Ou Thomas
- Kobie Uys as Kobie Botha (nie gekrediteer nie)
- Marietjie Uys as Marietjie Botha (nie gekrediteer nie)
Storielyn
wysigHans Botha, 'n ryk maar suinige boer, moet die nuwe onderwyseres op die dorp gaan haal. Hy is egter bang vir meisies en doen boonop alles verkeerd. Sy motor, 'n stokou Model T-Ford, se remme is gedaan en die bakwerk val uitmekaar. Telkens as hy stop om 'n hek oop te maak, spring hy uit om 'n klip voor die wiele te rol, maar die motor ry telkens daaroor. Nadat hy die nooientjie opgelaai het, ry hy deur 'n dam water waar die kar vassit. Terwyl hy haar probeer "red", laat hy haar in die water val. Later, tydens 'n piekniek kry hy kans om vir alles te vergoed, maar dinge loop steeds skeef. Hy dink aan hoe dit sou wees om 'n behoorlike motor te hê, en alles reg sou verloop. Gelukkig vir hom loop al hierdie manewales op 'n huwelik uit.
Sien ook
wysigVerwysings
wysig- ↑ HAT Taal-en-feitegids, Pearson, Desember 2013, ISBN 978-1-77578-243-8