Daily Mail
Die Daily Mail is 'n daaglikse Britse poniekoerant. Dit is opgerig in 1896 en word besit deur Daily Mail and General. Die oplaag van die Daily Mail beloop meer as 2 miljoen. Die koerant het, nes ander Britse dagblaaie, ook 'n Sondaguitgawe: The Mail on Sunday.
Die Daily Mail se politieke mening is regs, konserwatief en populisties en die koerant is krities ingestel jeens die Europese Unie, immigrante, buitelanders en ander minderhede. Naas die gebruiklike berigte oor die politiek, ekonomie, binne- en buitelandse nuus en menings, word heelwat aandag bestee aan sport, skandale van Britse en internasionale bekendes, gesondheidswenke en vrouesake soos grimering, mode en styl. Die koerant se bynaam, veral gebruik deur sy kritici, is die Daily Wail.
Die Daily Mail posisioneer hom as ordentliker, betroubaarder, deegliker en veral meer middelklas as die Britse sensasiekoerante soos The Sun en die Daily Mirror. As sodanig word dit dan ook beskou as behorende tot die sogenaamde middelmark. In die Daily Mail is daar dus geen bladsydriemeisie nie. Die koerant se teikengroep is die laermiddelklas.
Sy grootste mededinger is die Daily Express en die Daily Mail stem in vele opsigte met die Daily Express ooreen: die lettertipe, die politieke mening, skryfstyl en nuuskeuse.