Derg
Die Derg (van die Amhariese woord ደርግ, "komitee" of "raad"; Oromo: Dergii), amptelik die Voorlopige Militêre Regering van Sosialistiese Ethiopië (Amharies: የኅብረተሰብአዊት ኢትዮጵያ ጊዜያዊ ወታደራዊ መንግሥት, ye-Hebratasabʼāwit Ītyōṗṗyā Gizéyāwi Watādarāwi Mangeśt) was die militêre junta wat Ethiopië van 1974 tot 1987 regeer het, hoewel die militêre leierskap tot in 1991 aan die bewind gebly het.
Die Derg is in Junie 1974 gestig as die "Koördinerende Komitee van die Gewapende Magte, Polisie en Streeksweermag" deur offisiere van die Ethiopiese weermag en polisie. Dit is aanvanklik deur voorsitter Aman Andom gelei. Die Derg is amptelik hernoem tot die "Voorlopige Militêre Administratiewe Raad" en het die regering van die Keiserryk Ethiopië en keiser Haile Selassie in September 1974 omvergewerp tydens massaprotesoptogte. Die Derg het die monargie afgeskaf en ’n Marxisties-Leninistiese eenpartystaat gestig met homself as enigste party in ’n oorgangsregering. Die afskaffing van feodalisme, groter geletterdheid, nasionalisasie en groot grondhervormings het prioriteite geword. Mengistu Haile Mariam het in 1977 die voorsitter geword en die politieke Rooi Terreur-onderdrukkingsveldtog (Qey Shibir) begin om politieke teenstanders uit te wis, met tienduisende wat sonder verhoor in tronke gegooi en tereggestel is.[1]
Teen die middel 1980's het Ethiopië gebuk gegaan onder verskeie probleme, soos die herstel van ’n invalspoging deur die naburige Somalië, droogtes, ekonomiese agteruitgang en die hongersnood van 1983-1985. (Die Derg self het geraam daar was meer as ’n miljoen sterftes weens hongersnood in sy bewindstydperk.)[2] Dit is gevolg deur groter steun op buitelandse hulp en ’n geleidelike hervatting van konflik, veral Eritrea se onafhanklikheidsoorlog en die Ethiopiese Burgeroorlog. In 1987 het Mengistu die Derg afgeskaf en die Demokratiese Volksrepubliek van Ethiopië gestig wat gelei is deur die Arbeidsparty van Ethiopië. Die nuwe regering het burgerlikes ingesluit, maar is steeds deur oorblywende lede van die Derg oorheers.[3]
Verwysings wysig
- ↑ De Waal, Alex (1991). Evil Days: Thirty Years of War and Famine in Ethiopia. New York & London: Human Rights Watch. ISBN 1-56432-038-3.
- ↑ Gill, Peter (2010). Famine and Foreigners: Ethiopia Since Live Aid (PDF). Oxford University Press. pp. 43–44. ISBN 978-0-19-956984-7. Geargiveer vanaf die oorspronklike (pdf) op 16 Mei 2018. Besoek op 30 April 2019 – via South African History Online.
- ↑ David A. Korn, Ethiopia, the United States and the Soviet Union, Routledge, 1986, bl. 179
Skakels wysig
Hierdie artikel is in sy geheel of gedeeltelik uit die Engelse Wikipedia vertaal.
