Dinastie van Theodosius
Die Dinastie van Theodosius was ’n Romeinse familie wat magtig geword het aan die einde van die Romeinse Ryk se bestaan.
| Dinastie van Theodosius | |
|---|---|
| Tydperk | 379-457 n.C. |
| Oostelike keisers | Theodosius I Arcadius Theodosius II Marcianus |
| Westelike keisers | Honorius Valentinianus III |
| Opvolger | Thraciese Dinastie (ooste) Anicius (weste) |
Die stigter van die dinastie was Flavius Theodosius, ’n vooraanstaande generaal wat Britannia gered het van die Groot Sameswering. Sy seun, Flavius Theodosius, het in 379 keiser van die Oos-Romeinse Ryk (Bisantynse Ryk) geword en die twee dele van die Romeinse Ryk vir ’n kort rukkie herenig deur die indringer Eugenius te verslaan. Theodosius I is deur sy seuns Honorius in die weste en Arcadius in die Ooste opgevolg. Die Dinastie van Theodosius was verwant aan die Dinastie van Valentinianus omdat Theodosius I getrou het met Galla, ’n dogter van Valentinianus I. Hul dogter was Galla Placidia. Die laaste keiser van die dinastie in die Wes-Romeinse Ryk was Galla Placidia se seun Valentinianus III. Die laaste keiser in die Oostelike Ryk was Marcianus, wat keiser geword het deur te trou met Pulcheria, die ouer suster van Theodosius II, ná laasgenoemde se dood.
Afstammelinge van die dinastie het deel gebly van die Oos-Romeinse adel tot aan die einde van die 6de eeu.